महाराष्ट्र न्यूज वन प्रतिनिधी कोल्हापूर : शैक्षणिक वर्ष २०२४-२५ मध्ये पूर्व प्राथमिक व इयत्ता पहिलीसाठी २५ टक्के आरक्षण प्रवेश प्रक्रिया महाराष्ट्र शासनाच्या https://student.maharashtra.gov.in या वेबसाईटवरील RTE Portal या लिंकवर ऑनलाईन पध्दतीने राबविण्यात येत आहे. या प्रवेश प्रक्रियेअंतर्गत सोळा ते ३० एप्रिल २०२४ या कालावधीत सामाजिक वंचित घटक (एससी,एसटी, व्हीजेए, एनटीबी, एनटीसी, एनटीडी,ओबीसी, एसबीसी ) / आर्थिक दुर्बल घटक / घटस्फोटीत तसेच विधवा महिलांचे पाल्य, अनाथ / दिव्यांग / एच.आय.व्ही. किंवा कोविड प्रभावित बालके आदी घटकांतील मुलांच्या प्रवेशासाठी पालकांकडून ऑनलाईन अर्ज स्विकारण्यात येणार आहेत. जिल्ह्यातील इच्छुक पालकांनी RTE पोर्टलवर नमूद कालावधीत ऑनलाईन अर्ज करावेत, असे आवाहन शिक्षणाधिकारी अनुराधा म्हेत्रे यांनी केले आहे.
कालावधीनंतर ऑनलाईन प्रवेश अर्जासाठी मुदतवाढ दिली जाणार नाही. पालकांनी एकच परिपूर्ण अर्ज सादर करावा. एकापेक्षा जास्त अर्ज भरल्याचे निदर्शनास आल्यास सर्व अर्ज रद्द केले जातील. बालकांचा मोफत व सक्तीच्या शिक्षणाचा अधिकार अधिनियम २००९ मधील सुधारित अधिसूचना ९ फेब्रुवारी २०२४ नुसार बालकाच्या निवासस्थानापासून एक किलोमीटरपर्यतच्या अंतरावर अल्पसंख्यांक शाळा वगळता अनुदानित शाळा, शासकीय शाळा / स्थानिक स्वराज्य संस्थांच्या शाळा व स्वयं अर्थसहाय्यित शाळा पहिलीच्या वर्गाच्या एकूण विद्यार्थी संख्येपैकी २५ टक्के पर्यंतच्या जागांवर वंचित, दुर्बल व सामाजिक व शैक्षणिक दृष्टया मागासवर्ग घटकांतील बालकांना प्रवेश देण्यासाठी पात्र असतील, अशा बालकांना त्यांचे प्राथमिक शिक्षण पूर्ण होईपर्यंत मोफत व सक्तीचे शिक्षण पुरविण्यात येईल.