महाराष्ट्र न्यूज वन प्रतिनिधी, कोल्हापूर : ‘जिल्हा परिषदेच्या माध्यमातून सुरू असलेल्या विविध विकास योजनांना गती देण्यासाठी, योजनांचा लाभ अधिकाधिक लोकांपर्यंत पोहोचविण्यासाठी विभागप्रमुखांनी दर बुधवारी-गुरुवारी प्रत्यक्ष कामाच्या ठिकाणी भेटी द्यायच्या आहेत. आणि त्या संबंधींचा अहवाल शुक्रवारी साप्ताहिक बैठकीत सादर करायचा आहे. असे कोल्हापूर जिल्हा परिषदेचे मुख्य कार्यकारी अधिकारी कार्तिकेयन एस यांनी सांगितले. शिवाय दोन दिवसापेक्षा जास्त काळ कोणतीही फाइल एका टेबलवर प्रलंबित राहणार नाही यापद्धतीने गतीमान कामकाज करण्याविषयी अधिकाऱ्यांना सक्त सूचना केल्या आहेत असेही त्यांनी सांगितले.

कार्तिकेयन एस यांनी बुधवारी, मुख्य कार्यकारी अधिकारीपदाचा कार्यभार स्वीकारला. कार्तिकेयन एस हे २०२० मधील बॅचचे महाराष्ट्र केडरमधील आयएएस अधिकारी आहेत.ते मूळचे मदुराई येथील आहेत. सीए झाल्यानंतर त्यांनी भारतीय प्रशासकीय सेवेत दाखल झाले आहेत. दरम्यान कोल्हापूर जिल्हा परिषदेच्या सीईओपदी नियुक्ती झाल्यावर त्यांनी बुधवारी विभागप्रमुखांची बैठक घेतली. प्रत्येक विभागाची माहिती घेतली. 

जिल्हा परिषदेच्या प्रत्येक विभाग सक्षम आणि त्याद्वारे विकासकामांची प्रभावी अंमलबजावणी यावर आपला फोकस राहील. 

डेव्हलमपेंट टुरिझम या संकल्पनेतंर्गत प्रत्येक विभागाची प्रभावशाली कामगिरी होईल. जिल्हा परिषदेच्या उत्पन्नात वाढ व्हावी यादृष्टीने प्रयत्नशील राहीन. अधिकाऱ्यांच्या आढावा बैठकीत सूचना केल्या आहेत. पंचायत समित्यांच्या उत्पन्नात वाढ झाली पाहिजे. पंचायत समित्यांचे इमारत भाडे, वीज बिल याबाबतीत त्या स्वयंपूर्ण बनल्या पाहिजेत. विकास योजनांच्या अंमलबजावणीसंबंधी नागरिकांच्या ज्या अपेक्षा आहेत त्या पद्धतीने विकासकामे होतील.’असेही त्यांनी स्पष्ट केले.पत्रकार परिषदेवेळी अतिरिक्त मुख्य कार्यकारी अधिकारी अजयकुमार माने, सामान्य प्रशासन विभागाच्या उपमुख्य कार्यकारी अधिकारी मनिषा देसाई उपस्थित होत्या.