महाराष्ट्र न्यूज वन प्रतिनिधी, कोल्हापूर : महिला सुरक्षा व बाल सुरक्षा हा सार्वत्रिक चिंतेचा विषय बनला आहे. राज्यात ठिकठिकाणी अत्याचाराच्या घटना वाढत आहेत. अशा घटनांना पायबंद बसावा व महिलांच्या संरक्षणासाठी हातकणंगले तालुक्यातील माणगाव ग्रामपंचायतीने सुरक्षाविषयक अॅपची निर्मिती केली आहे. मोबाइलमध्ये Needly Sos (निडली एसओएस) अॅप उपलब्ध केले आहे. माणगाव ग्रामपंचायतीच्या या नाविन्यपूर्ण अॅपमुळे संबंधित घटनेची माहिती त्वरित मिळण्याची, त्या ठिकाणी माहिती कळेल अशी सुविधा केली आहे. विशेष म्हणजे, कोणी मोबाइल हिसकावून घेऊन ही सुविधा अनलॉक करण्याचा प्रयत्न केला तर त्या व्यक्तीचा फोटो आपोआप निघणार आहे.

या अॅपमुळे व्यक्ती ज्या ठिकाणी आहे तेथील ठिकाणाची माहिती कुटुंबीयांना मिळेल. याकरिता चार वेळा पावर बटण दाबणे किंवा अॅपमधील एसओएस बटन दाबल्यास मोबाइलधारकाच्या कुटुंबांतील चार व्यक्तींना त्यासंबंधीची माहिती मिळणार आहे. तसेच घटनेचे गांभीर्य पाहून तत्काळ महिला अत्याचार प्रतिबंधक पोलिस विभागाकडे ११२ नंबरवर संपर्क साधण्याची सुविधा आहे.

‘माणगाव ग्रामपंचायतीने सुरक्षा तुमची जबाबदारी आमची या हेतूने हे अॅप सुरू केले आहे. गावातील सर्व पुरुष, मुले व महिलांना निडली एसओएस अॅप उपलब्ध केले आहे. शिवाय या सुविधेसाठी जो खर्च येणार आहे, तो ग्रामपंचायत करणार आहे.सुरक्षाविषयक या अॅपचा लाभ लोकांनी घ्यावा.’असे आवाहन सरपंच राजू मगदूम व उपसरपंच विद्या जोग यांनी केले आहे.