महाराष्ट्र न्यूज वन प्रतिनिधी, कोल्हापूर : मंगळवार पेठेतील लेटेस्ट तरुण मंडळातर्फे गणेश विसर्जन मिरवणुकीत यंदा ‘लेटेस्ट रामराज्य’ हा सोहळा पाहता येणार आहे. शिवाय पुष्पक विमानाचा (गरुड वाहन) चित्ररथ हे मिरवणुकीचे आकर्षण ठरेल अशी माहिती मंडळाचे अध्यक्ष गजानन यादव यांनी दिली.
गणेश विसर्जन मिरवणुकीत शंभर गुढया अग्रभागी असतील. १२० जणांचे झांज पथक, धनगरी ढोल आणि पारंपरिक वेशभूषेतील ३५० हून अधिक कार्यकर्ते सहभागी होणार आहेत. मिरवणुकीतील वैशिष्टयाविषयी बोलताना अध्यक्ष यादव म्हणाले, ‘मंडळातर्फे यंदा, वनवास संपवून श्रीराम, सीता व लक्ष्मण हे पुष्पक विमानातून अयोध्यानगरीत येत आहेत या संकल्पनेवर मिरवणूक आहे. पुष्पक विमान अर्थात गरुड वाहन हे चित्ररथ १२ फूट रुंद आणि २४ फूट लांबीचे आहे.
मंगळवारी सकाळी दहा वाजता चित्ररथाचे उद्घाटन आहे. युवराज मालोजीराजे यांच्या हस्ते आणि पश्चिम महाराष्ट्र देवस्थान समितीचे सचिव शिवराज नाईकवडे यांच्या उपस्थितीमध्ये उद्घाटन होईल. यावेळी मूर्तीशास्त्र अभ्यासक प्रसन्न मालेकर, उमाकांत राणिंगा, माजी नगरसेवक राजू लाटकर उपस्थित राहणार आहेत. चित्ररथ निर्मितीसाठी मूर्ती अभ्यासक उमाकांत राणिंगा, ललित चिकसकर, ओंकार चिकसकर, बाळकृष्ण रानमाळे, भाऊसाहेब ढाले, सलीम पटेल, संतोष हिरलोस्कर, प्रशांत जाधव, अशोक कानकेकर, संतोष देसाई आदींचे सहकार्य लाभले.
पत्रकार परिषदेला मंडळाचे कार्याध्यक्ष संजय दौलत पाटील, अजित पोवार, प्रवीण फडतरे, अविनाश शिंदे, शिवाजी दळवी, संजय चव्हाण, सागर भांडवले, महेश कदम, पंडित पाटील आदी उपस्थित होते.