महाराष्ट्र न्यूज वन प्रतिनिधी, कोल्हापूर : पंचगंगा नदीच्या पाणी पातळीत वाढ होत असून शहरातील विविध भागांना पुराच्या पाण्याचा फटका बसत आहे. पंचगंगा नदी धोका पातळीवरुन (४३ फूट) वाहत असल्याने नागरिकांत धास्ती निर्माण झाली. नदीकाठावरील लोकवस्तीत पाणी शिरले आहे.शुक्रवारी, 26 जुलै 2024 रोजी रात्री अकरा वाजण्याच्या सुमारास कोल्हापुरातील जयंती नाल्यावर पाणी आले. यामुळे हा मार्ग वाहतुकीसाठी बंद केला आहे. नागरिकांनी पर्यायी मार्गाचा वापर करावा असे प्रशासनाने म्हटले आहे. राजाराम बंधारा येथे पंचगंगा नदीची पाणी पातळी ४६ फूट चार इंचावर पोहोचली आहे. शहरातील व्हिनस कॉर्नर, शाहूपुरी, बापट कॅम्प, लक्षतीर्थ वसाहत, रमणमळा परिसर अशा विविध भागात पाणी शिरले आहे. जिल्हाधिकारी कार्यालयनजीकच्या काही अपार्टमेटमध्ये पाणी शिरले होते. एनडीआरएफच्या जवानांनी त्या अपार्टमेंटमधील नागरिकांना बाहेर काढले आहे.