गांधी यांच्या दोन दिवशीय कोल्हापूर दौऱ्याची जय्यत तयारी करण्यात आली होती. शुक्रवारी सायंकाळी कसबा बावडा येथे होणाऱ्या कार्यक्रमासाठी सगळी तयारी पूर्ण झाली होती. सारा परिसर आकर्षक पद्धतीने सजवला होता. पानाफुलांनी सुशोभीत केला होता. विद्युत रोषनाई केली होते. या कार्यक्रमासाठी शिवभक्त व काँग्रेसच्या कार्यकर्त्यांनी मोठी गर्दी केली होती. काँग्रेसचे महाराष्ट्राचे प्रभारी रमेश चैनीथला, प्रदेशाध्यक्ष नाना पटोले, माजी मंत्री बाळासाहेब थोरात, विजय वडेट्टीवार, विश्वजीत कदम , खासदार शाहू महाराज, युवराज मालोजीराजे, आमदार ऋतुराज पाटील, आमदार जयश्री जाधव, आमदार जयंत आसगावकर, माजी खासदार  जयवंतराव आवळे, जिल्हा परिषदेचे माजी अध्यक्ष राहुल पाटील यांच्या सह जिल्ह्यातील काँग्रेसचे आजी माजी लोकप्रतिनिधी, पदाधिकारी भगवा चौक येथे मोठ्या संख्येने जमले होते. माणसांच्या गर्दीने चौक फुलला होता. साऱ्यांना गांधी यांच्या आगमनाची आतुरता लागून राहिली होते. गांधी यांच्या स्वागताची सुरू असताना साधारणपणे साडेपाच वाजण्याच्या सुमारास गांधी यांचा दौरा रद्द झाल्याची वार्ता आली.

 काँग्रेसचे आमदार सतेज पाटील यांनी, उपस्थित लोकांना गांधी यांचा शुक्रवारचा दौरा रद्द झाल्याची माहिती दिली. राहुल गांधी हे कोल्हापूरला निघण्यासाठी दिल्ली विमानतळावर पोहचले होते. मात्र विमानात तांत्रिक बिघाड झाल्यामुळे त्यांचा दौरा अचानक रद्द झाला. राहुल गांधी शनिवारी 5 ऑक्टोबर रोजी, सकाळी नऊ वाजता येणार आहेत. त्यांच्या उपस्थितीमध्ये सकाळी  दहा वाजता कसबा बावडा येथील छत्रपती शिवाजी महाराजांच्या पूर्णाकृती पुतळ्याचे अनावरण होईल असे आमदार पाटील यांनी सांगितले. तसेच गांधी यांच्या उपस्थितीमध्ये दुपारी हॉटेल सयाजी येथे संविधान सन्मान संमेलन होणार आहे.