महाराष्ट्र न्यूज वन प्रतिनिधी, कोल्हापूर : इचलकरंजी येथील एसटी सरकार गँगवर पोलिस प्रशासनाने कारवाई केली आहे. या गँगचा प्रमुख आणि माजी नगरसेवक संजय शंकरराव तेलनाडेसह सात जणांना वर्षभरासाठी कोल्हापूर जिल्ह्यातून हद्दपार केले आहे. गावभाग पोलिसांनी सादर केलेल्य प्रस्तावाला जिल्हा पोलिस अधीक्षक महेंद्र पंडित यांनी मान्यता दिली आहे.
एसटी गँगवर विविध स्वरुपाची १७ गुन्हे दाखल आहेत. त्यामध्ये खून, खुनाचा प्रयत्न, दरोडा, खंडणी, जबरी चोरी, फसवणूक, अवैध जुगार, मारामारी अशा गंभीर गुन्हयांचा समावेश आहे. पोलिसांनी, या सातही जणांना हद्दपारीच्या नोटीसा बजावल्या आहेत. माजी नगरसेवक संजय तेलनाडेसह इतरांचा समावेश आहे. यामध्ये अरविंद सुकुमार म्हस्के (अवधूत आखाडा), राकेश सुरेश कुंभार (महादेव मंदिराजवळ पाटील गल्ली), दीपक सतीश कोरे (राणाप्रताप चौक गावभाग), इमरान दस्तगीर कलावंत, आरिफ दस्तगीर कलावंत (गावभाग), अभिजीत सुभाष जामदार (जामदारवाडा नदीवेस नाका) यांच्यावर कारवाई झाली.
दरम्यान एसटी गँगवर कारवाई करण्यापूर्वी हद्दपारीच्या प्रस्तावाची नि:पक्षपातीपणे चौकशी करण्यासाठी पोलिस अधीक्षकांनी, शाहूवाडीच्या पोलिस उपअधीक्षकांची चौकशी अधिकारी म्हणून नियुक्ती केली होती. चौकशी अहवालात एसटी गँगमुळे सर्वसामान्य नागरिक व सामाजिक स्वास्थ्यास बाधा निर्माण होत असल्याचे म्हटले आहे.