महाराष्ट्र न्यूज वन प्रतिनिधी, कोल्हापूर : चेस असोसिएशन कोल्हापूरच्या मान्यतेने व लतादेवी अनिल लोहिया स्पोर्ट्स अकॅडमीच्या सहकार्याने  विझार्ड चेस क्लबने आयोजित केलेल्या नऊ वर्षाखालील मुला-मुलींच्या कोल्हापूर जिल्हा निवड बुद्धिबळ स्पर्धेस उत्साहात प्रारंभ झाला. स्पर्धेत कोल्हापूर, इचलकरंजी, वारणानगर, जयसिंगपूर, गडहिंग्लज व गारगोटी येथील नामांकित ५५ बुद्धिबळपटू सहभागी आहेत.

 स्पर्धेचे उद्घाटन रोटरी क्लब ऑफ कोल्हापूरचे अध्यक्ष व उद्योगपती अरुण गोयंका व युवा उद्योजक मनीष झंवर यांच्या हस्ते बुद्धिबळाच्या पटावर चाल करून करण्यात आले. यावेळी व्यासपीठावर आंतरराष्ट्रीय पंच भरत चौगुले, मनिष मारुलकर,अनिश गांधी, आरती मोदी, ऋतुराज भोकरे व सुशांत कांबळे  उपस्थित होते.
  रविवारी झालेल्या तिसऱ्या फेरीनंतर मुलांच्या गटात अद्वैत कुलकर्णी कोल्हापूर, युवेन भिडे इचलकरंजी, आरुष  पाटील गडहिंग्लज व अर्णव वरुटे इचलकरंजी हे चौघेजण तीन गुणासह संयुक्तपणे आघाडीवर आहेत. अवनीश बडवे इचलकरंजी, सुदर्शन पाटील इचलकरंजी व ऋतुराज पाटील इचलकरंजी हे तिघेजण अडीच गुणासह संयुक्तपणे द्वितीय स्थानावर आहेत.
 मुलींच्या गटात इचलकरंजीची सांची बजाज व कोल्हापूरची तनिषा चौगुले या दोघीजणी तीन गुणांसह संयुक्तपणे आघाडीवर आहेत. कृष्णा पाटील कोल्हापूर, चार्मी शहा इचलकरंजी, मनस्वी शिरगुरे नांदणी, शनया मालानी इचलकरंजी, भक्ती कोळी जयसिंगपूर व परिणीता हंडल कोल्हापूर या सहा जणी दोन गुणासह संयुक्तपणे द्वितीय स्थानावर आहेत.