महाराष्ट्र न्यूज वन प्रतिनिधी, कोल्हापूर : ‘आमच्याकडे इतकी भरती झालीय की ऑलरेडी काँग्रेस हाऊसफुल्ल झाली आहे, पण कोण येत असेल तर स्वागत आहे.’ असे विधान परिषदेतील काँग्रेसचे गटनेते सतेज पाटील यांनी केले.

  लोकसभेतील विरोधी पक्षनेते राहुल गांधी यांच्यासह काँग्रेसचे दिग्गज नेते मंडळी येत्या चार आणि पाच ऑक्टोबर रोजी कोल्हापूर दौऱ्यावर येत आहेत. या दौऱ्याच्या नियोजनासंबंधी स्टेशन रोड येथील काँग्रेस कमिटीत जिल्ह्यातील काँग्रेसच्या पदाधिकाऱ्यांचा मेळावा झाला. खासदार शाहू महाराज, आमदार राजू आवळे, आमदार जयश्री जाधव, आमदार जयंत आसगावकर यांची प्रमुख उपस्थिती होती. या दरम्यान पत्रकारांशी बोलताना आमदार पाटील यांनी काँग्रेसचे नेते राहुल गांधी यांच्या उपस्थितीत होणाऱ्या कार्यक्रमाची माहिती दिली.

याप्रसंगी आगामी विधानसभा निवडणुका, महाविकास आघाडीतील जागा वाटप यासंबंधी पत्रकारांच्या प्रश्नावर बोलताना आमदार पाटील म्हणाले, “ महाविकास आघाडी म्हणून पुढे जात असताना सगळयाच पक्षाला न्याय देण्याची भूमिका साऱ्यांची आहे. राज्यात जागा वाटपात काही ठिकाणी अदलाबदल होऊ शकते.”

अनेक नेते मंडळी महाविकास आघाडीकडे येत आहेत. चार आणि पाच ऑक्टोबर दरम्यान होणाऱ्या कार्यक्रमादरम्यान आणखी कोणाचे पक्षात इनकमिंग होणार आहे का या प्रश्नावर आमदार पाटील म्हणाले, ‘ऑलरेडी काँग्रेसमधील भरती हाऊसफुल्ल झाली आहे. पण कोण येणार असेल तर स्वागत आहे.’