![](_MaharashtraNews1/u/pos/202406/1000453344hU9X9q--800.jpg)
महाराष्ट्र न्यूज वन प्रतिनिधी कोल्हापूर : कोल्हापूर शहरातील राजाराम तलावाकाठी अत्याधुनिक व आंतरराष्ट्रीय स्तरावरील कन्व्हेंशन सेंटर उभारणीसाठी राज नियोजन मंडळाचे कार्यकारी अध्यक्ष राजेश क्षीरसागर यांचा पाठपुरावा सुरू आहे. त्यांच्या पाठपुराव्याला यश मिळू लागले आहे. या कन्व्हेन्शन सेंटरसाठी राज्याच्या अर्थसंकल्पामध्ये निधीची तरतूद करण्यात आली. यावर प्रतिक्रिया देताना क्षीरसागर यांनी हा कन्व्हेन्शन सेंटर कोल्हापूरच्या विकासाचा मानबिंदू ठरेल असे सांगितले.
कोल्हापूर जिल्ह्याचा झपाट्याने विस्तार होत असून, औद्योगिक, व्यापार, बांधकाम, कृषी या क्षेत्रातील सुरु असणारी घोडदौड त्यानुषंगाने सामाजिक, वैचारिक, राजकीय, सांस्कृतिक अभिसरण या सर्वांचा विचार करता विविध संघटनांच्या सामुहिक बैठका, विचारांचे अदान-प्रदान, सांस्कृतिक देवाण-घेवाण याकरिता एखादा जाहीर कार्यक्रम, बैठक, पत्रकार परिषद आयोजित करण्यासाठी शासनाचे अधिकृत कोणतेही केंद्र जिल्ह्यात उपलब्ध नाही. यामुळे विचारांचे आदान- प्रदान, सांस्कृतिक देवाण-घेवाण यावर मर्यादा येत आहेत. यामुळे अपेक्षित असणारी विकास प्रक्रिया गतिमान करताना अडथळे निर्माण होत आहेत. ही उणीव दूर करण्याच्या हेतून कोल्हापूर जिल्ह्याच्या केंद्रस्थानी कोल्हापूर शहरात परिषद केंद्राची निर्मिती करावी, अशी मागणी राज्य नियोजन मंडळाचे कार्यकारी अध्यक क्षीरसागर यांनी मुख्यमंत्री एकनाथ शिंदे यांच्याकडे ९ जानेवारी २०२३ रोजी लेखी पत्राद्वारे केली होती. याबाबत तपासून अहवाल सादर करण्याचे आदेश मुख्यमंत्री शिंदे यांनी नियोजन विभागाच्या प्रधान सचिवांना दिले होते. त्यानुसार नियोजन विभागाकडून अत्याधुनिक नॅशनल कन्व्हेंशन सेंटर उभारण्यासंदर्भातील प्रस्ताव शासन स्तरावर सादर करण्याचे निर्देश देण्यात आले होते. त्यानुसार जिल्हाधिकारी कार्यालयाकडून अत्याधुनिक नॅशनल कन्व्हेंशन सेंटर उभारण्यासाठी राजाराम तलाव येथील जागा प्रस्तावित केली आहे. यासंदर्भात कोल्हापूर मध्ये राजाराम तलावाच्या बाजूला कन्व्हेन्शन सेंटर उभारण्याबाबत सह्याद्री अतिथी गृह येथे मुख्यमंत्री शिंदे यांच्या अध्यक्षतेखाली बैठक पार पडली. या बैठकीमध्ये दोन हजार प्रेक्षक क्षमतेचे अत्याधुनिक सेंटर उभारण्याचा निर्णय घेण्यात आला होता. यानंतर क्षीरसागर यांनी गेल्या आठवड्यात पुन्हा मुख्यमंत्र शिंदे, उपमुख्यमंत्री अजित पवार, आणि उपमुख्यमंत्री देवेंद्र फडणवीस यांची भेट घेऊन या अर्थसंकल्पात कन्व्हेन्शन सेंटरसाठी निधीची तरतूद होण्याची मागणी केली होती. त्यांच्या पाठपुराव्यास यश आले असून, कोल्हापूर शहरातील राजाराम तलावाकाठी अत्याधुनिक आंतरराष्ट्रीय कन्व्हेन्शन सेंटर उभारण्यास आजच्या अर्थसंकल्पात तरतूद करण्यात आली आहे.
दरम्यान कोल्हापूर शहरात अत्याधुनिक नॅशनल कन्व्हेंशन सेंटर निर्मितीसाठी २५० कोटी इतका निधी मंजूर करण्याची मागणी क्षीरसागर यांनी होती.