महाराष्ट्र न्यूज वन प्रतिनिधी, कोल्हापूर : शिवाजी विद्यापीठातील सेवानिवृत्त प्रा. डॉ. मीना मुरलीधर डोंगरे यांना डिजिटल अरेस्टची भिती घालून तब्बल तीन कोटी ५७ लाख २३ हजार रुपये उकळले आहेत. पोलिस अधिकारी असल्याचे भासवून फसवणुकीचा हा ऑनलाइन प्रकार केला आहे. २८ एप्रिल ते २७ मे २०२५ या कालावधीत चौदा वेळा रक्कमा उकळल्या आहेत. या प्रकरणी राजारामपुरी पोलिस ठाण्यात गुन्हा दाखल करण्यात आला आहे. डोंगरे पती-पत्नी हे शिवाजी विद्यापीठातील सेवानिवृत्त प्राध्यापक आहेत.

तिघा तोतयांनी व्हॉटसअॅप कॉल करुन ‘मनी लाँडरिग प्रकरणात तुमचे नाव आहे. तुम्हाला केव्हाही अटक होऊ शकते. तुमच्या आधारकार्डद्वारे माहिमच्या बँकेत अनोळखी व्यक्तीकडून सहा कोटी रुपये जमा आहेत. तुमच्यावर गुन्हा दाखल आहे.’अशी भीती घातली. व्हॉटसअॅप केलेल्या तिघांनीही अधिकाऱ्यांच्यासारखा गणवेश परिधान केला होता. शिवाय त्यांनी, डोंगरे यांना अटक टाळण्यासाठी आम्ही कळविलेल्या बँक खात्यावर रक्कम जमा करा असे बजावले. त्यांनी नऊ वेगवेगळया मोबाइल क्रमांकावरुन डोंगरे यांच्याशी संपर्क साधला. पैसे पाठविले नाही तर घरी येऊन अटक करू अशी धमकी दिली.

अटकेच्या भीतीने डोंगरे यांनी महिनाभराच्या कालावधीत चौदा वेळेला रक्कम पाठविली. रक्कम पाठविण्यासाठी प्राध्यापिकेने बँकेतील ठेव पावत्याही मोडल्या.  डोंगरे यांची मुलगी डॉक्टर आहे. दोन दिवसापूर्वी त्यांना हा प्रकार समजला. त्यांनी, आईंना घेऊन राजारामपुरी पोलिस ठाण्यात आल्या. पोलिस निरीक्षक सुशांत चव्हाण यांची भेट घेतली. पोलिसात फिर्याद दाखल केली.