महाराष्ट्र न्यूज वन प्रतिनिधी कोल्हापूर : महाराष्ट्र विधानसभेसाठी 20 नोव्हेंबर 2024 रोजी मतदान होणार आहे. राज्यातील 288 विधानसभा जागेसाठी 9 कोटी 63 लाख मतदार आपले मतदानाचा हक्क बजावणार आहेत. केंद्रीय निवडणूक आयोगाने मंगळवारी पत्रकार परिषदे घेऊन महाराष्ट्रातील विधानसभा निवडणुकीचा कार्यक्रम घोषित केला. जास्तीत जास्त मतदारांनी या निवडणुकीत मतदानाचा हक्क बजावावा. मतदान केंद्रावर जाऊ न शकणाऱ्या मतदारासाठी घरातून मतदानाची सुविधा उपलब्ध केली असल्याचेही निवडणूक आयोगाने म्हटले आहे. मुख्य निवडणूक आयुक्त राजीव कुमार यांनी निवडणुकीचा कार्यक्रम घोषित केला. व्होटर अॅप वर मतदार आपले सर्व माहिती तपासू शकतात. दरम्यान 26 नोव्हेंबर रोजी सध्याच्या विधानसभा सभागृहाचा कार्यकाळ संपणार आहे. निवडणूक आयुक्त राजीव कुमार म्हणाले, निवडणूक प्रक्रियेवर बारकाईने लक्ष असणार आहे. पैसे, मद्य वाटप यावर नजर ठेवली जाईल. सर्वांनीच आचारसंहितेचे पालन करावे. निवडणुकीत मतदारांची भागीदारी आवश्यक आहे. महाराष्ट्रात 20 नोव्हेंबरला मतदान होईल आणि 23 नोव्हेंबर रोजी मतमोजणी आहे. महाराष्ट्रात एकाच टप्प्यात मतदान होईल. 23 ऑक्टोबर ते 29 ऑक्टोबर 2024 या कालावधीत उमेदवारी अर्ज दाखल करता येणार आहे. 30 ऑक्टोबरला उमेदवारी अर्जदारांची छाननी होईल. 4 नोव्हेंबरपर्यंत उमेदवारी अर्ज माघार घेण्याची मुदत आहे.