महाराष्ट्र न्यूज वन प्रतिनिधी, कोल्हापूर : ‘ कोल्हापूर मेडिकल असोसिएशनतर्फे १९ ते २० ऑक्टोबर २०२४ या कालावधीत ‘केएमए-कॉन २०२४’ वैद्यकीय परिषदेचे आयोजन केले आहे. यावर्षीच्या परिषदेचे ब्रीदवाक्य ‘ डॉक्टर बियाँड मेडिसीन ३६० डिग्री’असे आहे. या अंतर्गत डॉक्टरांच्या वैद्यकीय सेवांपलिकडे असलेल्या विस्तारित भूमिकांवर प्रकाशझोत टाकण्यात येणार आहे.’असे मेडिकल असोसिएशनचे अध्यक्ष डॉ. अमोल कोडोलीकर व परिषदेचे अध्यक्ष डॉ. दीपक जोशी यांनी पत्रकार परिषदेत सांगितले. या परिषदेत ५०० हून अधिक डॉक्टर्स सहभागी होणार आहेत.

हॉटेल सयाजी येथे हे दोन दिवसीय परिषद होणार आहे. १९ ऑक्टोबर रोजी सायंकाळी सहा वाजता परिषदेचे उद्घाटन होईल. भारतीय लष्कराचे माजी प्रमुख जनरल मनोज नरवणे हे प्रमुख पाहुणे म्हणून उपस्थित राहणार आहेत. याप्रसंगी डॉ. शरद भुथाडिया यांचा सत्कार करण्यात येणार आहे. परिषदेच्या दुसऱ्या दिवशी, २० ऑक्टोबर रोजी ‘डॉक्टरांनी दैनंदिन जीवनातील आव्हानांना कसे सामोरे जायचे,आधुनिक तंत्रज्ञानांचा वापर, एकात्मिक आरोग्य सेवा कशी द्यावी, आर्टिफिशियल इंटेलिजन्स, वजन नियोजन, डॉक्टरांसाठी आर्थिक नियोजन अशा विविध विषयावर मार्गदर्शन सत्रे होतील. कार्डिओलॉजिस्ट सुनील साठे, मिरज येथील डॉ. जी. एस. कुलकर्णी, डॉ. तेजस कुलकर्णी, डॉ. ममता लाला हे मार्गदर्शन करणार आहेत. या परिषदेत भूलतज्ज्ञ डॉ. शकील मोमीन यांना जीवन गौरव पुरस्कार वितरण करण्यात येणार आहे.

पत्रकार परिषदेला केएएमचे उपाध्यक्ष डॉ. ए. बी. जाधव, डॉ. आर. एम. कुलकर्णी, केएमएचे मानद सचिव डॉ. शीतल देसाई, परिषदेच्या आयोजन सचिव डॉ. सरोज शिंदे, परिषदेच्या सहअध्यक्षा डॉ. अर्चना पवार, डॉ. प्रविण नाईक, डॉ. स्नेहलदत्त खाडे, डॉ. आशा जाधव, डॉ. कृष्णा केळवकर, डॉ. शुभांगी पार्टे, डॉ. सुर्यकांत मस्कर, डॉ. महावीर मिठारी, डॉ. अश्विनी पाटील आदी उपस्थित होते.