महाराष्ट्र न्यूज वन प्रतिनिधी,कोल्हापूर : राज्य सरकारने सात अपर जिल्हाधिकाऱ्यांच्या बदल्या केल्या आहेत. यामध्ये पुणे विभागाच्या म्हाडाचे मुख्य कार्यकारी अधिकारी अशोक पाटील यांची बदली पुणे येथे सहनोंदणी महानिरीक्षक तथा मुद्रांक अधीक्षक पदावर झाली. कोल्हापूर जिल्हा नियोजन अधिकारी विजय पवार यांची बदली छत्रपती संभाजीनगर येथील विभागीय आयुक्त कार्यालयात उपायुक्त (नियोजन) या पदावर झाली. पवार यांच्या बदलीने रिक्त झालेल्या कोल्हापूर जिल्हा नियोजन अधिकारीपदी विजय भोपळे यांची नियुक्ती झाली आहे. दरम्यान अशोक पाटील यांच्या बदलीने रिक्त झालेल्या पुणे म्हाडा मुख्य कार्यकारी अधिकारीपदी दीपक साकोरे यांची नियुक्ती झाली. मुंबई येथील आरोग्य उपसंचालक कार्यालयातील उपसंचालक सुभाष बोरकर यांची बदली नाशिक विभागीय आयुक्त कार्यालयात अपर आयुक्त (प्रशासन) म्हणून झाली आहे. याशिवाय अजय सुभाष मोरे, समीक्षा चंद्राकार, प्रकाश अहिरराव, प्रवीण महाजन, अरुण आनंदकर या अधिकाऱ्यांच्या बदल्या झाल्या आहेत.