महाराष्ट्र न्यूज वन प्रतिनिधी कोल्हापूर : येथील स्टेट बँक ऑफ इंडिया, कोल्हापूर क्षेत्रीय कार्यालयतर्फे स्वच्छ्ता ही सेवा या अभियान अंतर्गत स्वच्छ्ता अभियान रंकाळा पदपथ उद्यान येथे राबवण्यात आले. यावेळी रंकाळा पदपथ उद्यान येथील परिसराची स्वच्छ्ता करण्यात आली.
यावेळी बोलताना बँकेचे क्षेत्रीय प्रबंधक राजीव गुप्ता म्हणाले की, स्टेट बँक ऑफ इंडिया ही बँकिंग सोबत सामाजिक भावना जपत वेगवेगळे सामाजिक उपक्रम नेहमीच राबवत असते. स्वच्छ्ता हा महत्त्वाचा घटक असून प्रत्येकाने आपल्या घरच्याप्रमाणे आपापल्या परिसरातील स्वच्छ्ता ही तेवढ्याच आस्थेने जपली पाहिजे.
महापालिकेचे सफाई कर्मचारी हे आपल्याला निरोगी ठेवण्यासाठी कार्य करतात, ते खऱ्या अर्थाने आरोग्य दूत आहेत असेही ते म्हणाले. यावेळी बँकेतर्फे महापालिकेच्या सफाई कर्मचाऱ्यांचा सत्कार क्षेत्रीय प्रबंधक राजीव गुप्ता यांच्या हस्ते करण्यात आला. या कार्यक्रमास रंकाळा परिसरातील सामाजिक कार्यकर्ते राजेंद्र पाटील, मुख्य प्रबंधक पंकज कुमार, तृप्ती फातले, वैभव साठे, सूर्यकांत माळी यांच्यासह कोल्हापुरातील विविध शाखांतील अधिकारी व कर्मचारी मोठ्या संख्येने उपस्थित होते.