महाराष्ट्र न्यूज वन प्रतिनिधी, कोल्हापूर : मुख्यमंत्री एकनाथ शिंदे यांच्या नेतृत्वाखालील शिवसेनेने विधानसभा निवडणुकीसाठी राज्यभरातील विविध मतदारसंघासाठी ४५ उमेदवारांची पहिली यादी जाहीर केली. या पहिल्या यादीमध्ये कोल्हापूर जिल्ह्यातील दोन मतदारसंघात शिवसेनेने उमेदवारी घोषित केली आहे. राधानगरी-भुदरगड मतदारसंघातून विद्यमान आमदार प्रकाश आबिटकर तर करवीर मतदारसंघातून माजी आमदार चंद्रदीप नरके यांना उमेदवारी मिळाली आहे.
आमदार प्रकाश आबिटकर हे यापूर्वी २०१४ आणि २०१९ मध्ये राधानगरी-भुदरगड मतदारसंघातून दोन वेळेला निवडून आले आहेत. तर करवीरमधून उमेदवारी जाहीर झालेले चंद्रदीप नरके यांनी २००९ आणि २०१४ मध्ये विधानसभा निवडणूक जिंकली होती.
सांगली जिल्ह्यातील खानापूर मतदारसंघात सुहास अनिल बाबर यांना उमेदवारी मिळाली. सांगोला मतदारसंघातून विद्यमान आमदार शहाजी पाटील यांना उमेदवारी तर सावंतवाडीतून विद्यमान आमदार व मंत्री दीपक केसरकर यांना उमेदवारी आहे. पाटणमधून शंभूराजे देसाई, कोरेगावमधून महेश शिंदे, महाडमधून भरत गोगावले हे विद्यमान आमदार पुन्हा शिवसेनेकडून मैदानात असतील.