महाराष्ट्र न्यूज वन प्रतिनिधी, कोल्हापूर : कोल्हापुरात दहा ऑगस्ट २०२४ रोजी वकील परिषद होणार आहे. मुंबई हायकोर्टाचे सर्किट बेंच कोल्हापुरात होण्यासाठी सहा जिल्ह्यातील वकील या परिषदेत आंदोलनाची दिशा ठरविणार आहेत. वकील परिषद कोल्हापुरात भरविण्याचा निर्णय कोल्हापूर जिल्हा बार असोसिएशनच्या सर्वसाधारण सभेत झाला. बार असोसिएशनचे अध्यक्ष अॅड. सर्जेराव खोत यांच्या अध्यक्षतेखाली न्यायसंकुलातील राजर्षी शाहू सभागृह येथे सभा झाली.
खोत म्हणाले, ‘गेली चार दशके खंडपीठासाठी लढा सुरू आहे. कोल्हापूर, सांगली, सातारा, सोलापूर, रत्नागिरी, सिंधुदुर्ग जिल्हयासाठी हे खंडपीठ उपयुक्त ठरणार आहे. किमान सर्किट बेंच होण्यासाठी आंदोलन पुकारले आहे. वकील परिषदेत आंदोलनाची दिशा ठरविली जाईल. महासैनिक दरबार हॉल येथे ही परिषद होईल. ’
महाराष्ट्र आणि गोवा बार असोसिएशन कौन्सिलचे सदस्य अॅड विवेकानंद घाडगे, अॅड. समीलउल्ला पाटील, अॅड. प्रकाश मोरे, अॅड. सतीश खोतलांडे, अॅड. किरण पाटील, अॅड. अजित मोहिते, अॅड. रणजित गावडे, अॅड. राणाप्रताप सासने. अॅड. आसावरी कुलकर्णी यांनी वकील परिषद यशस्वी करण्याच्या अनुषंगाने विविध सूचना केल्या. अॅड. निशिकांत पाटील यांनी स्वागत केले. सहसचिव राजू ओतारी यांनी आभार मानले. याप्रसंगी निशिकातं पाटोळे, उमेश माणगावे, कर्णकुमार पाटील, चंद्रकांत कुरणे आदी उपस्थित होते.