महाराष्ट्र न्यूज वन प्रतिनिधी, कोल्हापूर : सानेगुरुजी वसाहत परिसरातील देशमुख शिक्षण संकुलात व्हिडिओ निर्मिती स्पर्धेतील विजेत्या शिक्षकांचा सत्कार करण्यात आला. राज्य सरकारच्या शालेय शिक्षण विभागामार्फत २०२३ मध्ये शिक्षकांसाठी दर्जेदार व्हिडिओ निर्मिती स्पर्धा झाली होती. या स्पर्धेत देशमुख शिक्षण समूहातील एकूण चार शिक्षकांनी तालुका स्तरापासून राज्य पातळीपर्यंत यश मिळवले.
शिक्षक डी. जे. वाघ, एस. पी. डोंगळे, एस. बी. शिंदे, शिक्षिका व्ही. पी. माळी यांचा संस्थेतर्फे प्राचार्य डॉ. जे. के. पवार यांच्या हस्ते सत्कार करण्यात आला. याप्रसंगी संस्था कार्याध्यक्ष सुनील कुरणे, संचालिका प्रमिला देशमुख, संचालक सिद्धार्थ देशमुख, प्राचार्य बी. यु. जाधव तसेच सर्व शाखांचे मुख्याध्यापक उपस्थित होते. पी. एस. नाईक यांनी प्रास्ताविक केले. शिक्षिका एस. आर. पाटील यांनी आभार मानले.