महाराष्ट्र न्यूज 1 प्रतिनिधी, कोल्हापूर : रोटरी क्लबतर्फे शहरातील दहा क्षयरुग्णांना सहा महिन्यांकरीता दत्तक घेऊन त्यांना पोषण आहार (फुड बाक्सेट) देण्यात येणार आहे.
“क्षय बाधीत रुग्णास सामान्य रुग्णांपेक्षा प्रोटिनची भरपुर मात्रा असलेला सकस आहार मिळणे अत्यंत गरजेचे असते. अशा गरीब, गरजु रुग्णांना समाजातील सेवाभावी संस्था, दानशुर व्यक्ती यांनी पोषण आहारासाठी मदत करण्यासाठी पोषक आहाराच्या स्वरुपातच मदत करावी’असे आवाहन उपायुक्त रविकांत आडसूळ यांनी केले होते. या आवाहनास प्रतिसाद देऊन रोटरी क्लबने शहरातील दहा क्षयरुग्णांना दत्तक घेतले.
यावेळी आरोग्याधिकारी डॉ.प्रकाश पावरा यांनी प्रधानमंत्री टीबी मुक्त भारत अभियानाची माहिती दिली. रोटरीचे डिस्ट्रीक गव्हर्नर (डी.जी) व्यंकटेश देशपांडे यांनी क्षयरोग निर्मुलनाकरीता रोटरी क्लब कायम अग्रभागी राहील याची ग्वाही दिली. कार्यक्रमास रोटरी क्लबचे धनंजय थोरात, राहुल काथरुट, डॉ.अभिजीत वज्रमुष्टी, दिपीन जाजु, प्रशांत मेहता, वैद्यकीय अधिकारी डॉ.अमरसिंह पवार उपस्थित होते. वैद्यकीय अधिकारी डॉ.रुपाली दळावी यांनी आभार मानले. समाजातील स्वयंसेवी संस्था व दानशुर व्यक्तींनी या मोहिमेस सहकार्य करण्यासाठी मिरजकर तिकटी ईगल प्राईड बिल्डींग येथील महापालिकेच्या शहर क्षयरोग नियंत्रण कार्यालय या पत्यावर संपर्क साधावा असे आवाहन महापालिकेने केले आहे.