महाराष्ट्र न्यूज वन प्रतिनिधी, कोल्हापूर : ‘कोल्हापूर उत्तर विधानसभा मतदारसंघ हा शिवसेना ठाकरे पक्षालाच मिळायला हवी. काँग्रेसच्या नेत्यांनी मन मोठे करुन ही जागा शिवसेना ठाकरे पक्षाला सोडायला पाहिजे.’अशी आग्रही मागणी पदाधिकारी व कार्यकर्त्यांनी केल्या. या मेळाव्यात बोलताना उपनेते संजय पवार यांनी, ‘हा मतदारसंघ कोणाकडे यासंबंधी अद्याप निर्णय झाला नाही. शिवसेना पक्षप्रमुख उद्धव ठाकरे जो आदेश देतील तो अंतिम असेल.’असे स्पष्ट केले.
शहरप्रमुख सुनील मोदी यांनी कोल्हापूर उत्तर ही जागा शिवसेनेला मिळायला हवी असे सांगितले. शशी बीडकर, विशाल देवकुळे, रणजित आयरेकर यांनी शिवसेनेलाच हा मतदारसंघ मिळायला हवा. मातोश्रीचे आदेश आहेत म्हणून आम्ही काम करत आहे. अशा शब्दांत भावना व्यक्त केल्या. दीपक गौड, माजी नगरसेवक नियाज खान यांनीही मनोगत व्यक्त केले. सहसंपर्कप्रमुख विजय देवणे म्हणाले, ‘काँग्रेसचे नेते आमदार सतेज पाटील यांनी हा मतदारसंघ काँग्रेसला मिळायला हवा हा हट्ट सोडावा. शिवसेनेच्या कोणत्याही कार्यकर्त्याला उमेदवारी मिळू दे, आम्ही त्यांचा प्रचार करू.’ शहरप्रमुख रविकिरण इंगवले हे मेळाव्याला उपस्थित नव्हते. त्यांचे मनोगत सागर साळोखे यांनी वाचून दाखविले. इंगवले यांनी ही कोल्हापूर उत्तर हा मतदारसंघ शिवसेनेकडेच पाहिजे अशी भूमिका मांडली आहे.