कोल्हापूर उत्तर विधानसभा मतदारसंघासाठी कोणताही समझोता केला जाणार नाही. कोल्हापूर उत्तर हा राष्ट्रवादी शरद पवार गटाचा मतदार संघ आहे. त्यावर आमचा 100 टक्के दावा आहे. हा मतदारसंघ राष्ट्रवादीलाच मिळाला पाहिजे अशी आग्रही भूमिका ही पाटील यांनी मांडली. कोल्हापूर जिल्ह्यात महाविकास आघाडीचे नेते म्हणून आमदार सतेज पाटील हे काम बघतात मात्र त्यांनी जिल्ह्यातील विधानसभा मतदारसंघनिहाय चर्चा करण्यासाठी आम्हाला विश्वासात घेतले नाही. काँग्रेस परस्पर प्रत्येक विधानसभा मतदारसंघावर दावा करत आहे. पूर्वी लोकसभेचे कोल्हापूर आणि हातकणंगले मतदारसंघ राष्ट्रवादीकडे होते. मात्र गेल्या लोकसभा निवडणुकीत कोल्हापूर मतदारसंघ हा राष्ट्रवादीने काँग्रेससाठी सोडला तर हातकणंगले मतदारसंघ शिवसेना ठाकरे गटाला दिला. त्यावेळी कोल्हापूर उत्तर मतदारसंघ राष्ट्रवादीकडे देण्याची चर्चा झाली होती असे असताना आता काँग्रेसचे नेते मंडळी त्या साऱ्या गोष्टींना बगल देऊन सर्वच जागेवर हक्क सांगत आहेत काँग्रेसच्या या भूमिकेला आमचा विरोध आहे. लोकसभा निवडणुकीत कोल्हापूर मतदारसंघातील उमेदवार शाहू महाराज यांच्या विजयासाठी राष्ट्रवादी शरद पवार गट,  शिवसेना ठाकरे गट व काँग्रेससह महाविकास आघाडीतील सर्वच घटक पक्षांनी प्रयत्न केले होते मात्र विजयाचे श्रेय केवळ काँग्रेसचे नेते मंडळी घेत आहेत. आमच्यामुळेच हे यश मिळाल्याचे दाखवण्याचा प्रयत्न काँग्रेस का करत आहे ?  मुळात शाहू छत्रपती हे निवडणूकीसाठी तयार नव्हते परंतु व्ही बी  पाटील व पी एन पाटील यांनी शाहू महाराजांना जनतेच्या हितासाठी  निवडणूक लढवावी लागेल असे सांगून त्यांना निवडणूकसाठी तयार केले हे सत्य आहे. याकडे पाटील यांनी लक्ष वेधले. पाटील म्हणाले ,चंदगड विधानसभा मतदारसंघ  राष्ट्रवादी शरद पवार गटाकडे असताना तेथे उमेदवारी कोणाला द्यायची हा पक्षांतर्गत बाब आहे. मात्र चंदगड विधानसभा मतदारसंघांमध्ये राष्ट्रवादीच्या उमेदवाराला बदला म्हणून वेगळी आघाडी उघडण्याचा प्रयत्न काही जण करत आहेत तो त्वरित थांबवावा. राष्ट्रवादीच्या उमेदवाराबद्दल बोलण्याचा अधिकार बाकीच्यांना कोणी दिला. राष्ट्रवादीचा उमेदवार कोण असावा हे पक्षाचे नेते ठरवतील असेही पाटील यांनी सांगितले.

 पालकमंत्री हसन मुश्रीफ म्हणजे राष्ट्रवादी काँग्रेस पक्ष नव्हता. मुश्रीफ यांच्या कालावधीत कधीच पक्षाचा जिल्ह्यात विस्तार झाला नव्हता.  उलट गेल्या दीड वर्षांमध्ये जिल्हाध्यक्ष व्ही बी पाटील व शहराध्यक्ष आर के पोवार यांच्या नेतृत्वाखाली जुन्या नव्यांची सांगड घालून जिल्ह्याच्या बारा तालुक्यांमध्ये राष्ट्रवादी शरद पवार पक्ष उभा करण्याचे प्रामाणिक प्रयत्न केला आहे. शरद पवार पक्षाची प्रत्येक तालुक्यात आज 25 ते 30 हजार मते आहेत. ज्यांना कोणाला राष्ट्रवादी शरद पवार पक्षाचे जिल्ह्यात अस्तित्व नाही असे वाटते त्यांनी कोल्हापूर जिल्हामध्ये मैत्रीपूर्ण लढत करण्याची हिंमत ठेवा म्हणजे कोण किती पाण्यात आणि कोण किती पाण्यावर आहे हे कळेल

 पत्रकार परिषदेला शहराध्यक्ष आर के पोवार, पद्मा तिवले, युवक राष्ट्रवादीचे रोहित पाटील, निरंजन कदम, सुनील देसाई अनिल घाटगे, रामराजे बदाले, आप्पा हजारे, श्रीकांत पाटील, संजय शिंदे, गणेश जाधव, महंमद महात , मोहन कांबळे, संतोष मेंगाने, गौरव पनोरेकर आदी उपस्थित होते