महाराष्ट्र न्यूज वन प्रतिनिधी, कोल्हापूर : उच्च प्रतीच्या दुधासाठी गोकुळ प्रसिद्ध. कोल्हापूर जिल्हा सहकारी दूध उत्पादक संघाच्या चविष्ठ व दर्जेदार दुग्धजन्य पदार्थांची चव प्रत्येकाच्या जीभेवर आहे. गोकुळच्या दुग्धजन्य पदार्थांची विक्री आता परदेशात सुरू झाली आहे. पूर्व युरोपधील अझरबैजान या देशाला गोकुळची देशी लोणी निर्यात केली आहे. गाय दुधाचे देशी लोणी (बटर) पूर्व युरोप व पश्चिम आशिया सीमेवरील अझरबैजान या देशातील अटेना दूध संघास निर्यात केली जाणार आहे. याद्वारे गोकुळचे दुग्धजन्य पदार्थ आशिया व युरोपातील देशामध्ये उपलब्ध होणार आहेत.

   चेअरमन अरुण डोंगळे म्हणाले, गोकुळची उत्‍पादने नेहमीच गुणवत्तापूर्ण असल्‍याने गोकुळला मानाचे स्‍थान निर्माण झाले आहे. संघामार्फत वेगवेगळे दुग्ध पदार्थ मार्केटमध्ये विक्री केले जातात, दुग्ध पदार्थांची विक्री वाढवण्याच्या दृष्टीने व अतिरिक्त गाय दुधाची निर्गत होणेसाठी गाय दुधाचे पदार्थ निर्यातीसाठी संघातर्फे प्रयत्न सुरू होते. याचाच एक भाग म्हणून अझरबैजान या देशांमधील मे. अटेना डेअरी यांनी संघाचे गाय देशी लोणी (बटर) खरेदी केली .नजीकच्या काळामध्ये  अटेना ग्रूप यांनी संघाकडून आणखी लोणी, दूध भुकटी व तूप खरेदी करण्यामध्ये स्वारस्य दाखवले असून त्यांना संघाचे दुग्ध पदार्थ निर्यात करण्यात येतील व भविष्यात इतर देशांना हि गोकुळची दर्जेदार दुग्ध उत्पादने निर्यात करण्याच्या दृष्टीने प्रयत्नशील आहे.

यावेळी संघाचे संचालक बाबासाहेब चौगले, अजित नरके, शशिकांत पाटील–चुयेकर, किसन चौगले, नंदकुमार ढेंगे, संभाजी पाटील, प्रकाश पाटील, सुजित मिणचेकर, अमरसिंह पाटील, बयाजी शेळके, कार्यकारी संचालक योगेश गोडबोले, बोर्ड सेक्रटरी प्रदीप पाटील, डेअरी महाव्यवस्थापक अनिल चौधरी, प्रशासन व्यवस्थापक रामकृष्ण पाटील, मार्केटींग व्यवस्थापक हणमंत पाटील, उपेंद्र चव्हाण, लक्ष्मण धनवडे उपस्थित होते.