महाराष्ट्र न्यूज वन प्रतिनिधी कोल्हापूर  : कोल्हापूर जिल्हा सहकारी दूध उत्पादक संघाचे माजी चेअरमन व ज्येष्ठ संचालक विश्वास नारायण पाटील यांचा शिवसेना पक्षप्रवेश पुन्हा एकदा लांबणीवर पडला. उपमुख्यमंत्री एकनाथ शिंदे यांच्या उपस्थितीमध्ये शनिवारी 10 जानेवारी 2026 रोजी त्यांचा शिवसेना पक्षप्रसिद्ध कार्यक्रम होणार होता. कार्यक्रमाची तयारी करण्यात आली होती. ठिकाण ही ठरवले होते. मात्र महापालिका निवडणूक धामधुमीमुळे उपमुख्यमंत्री शिंदे हे कोल्हापुरात दोन तास उशिरा पोहोचले. त्यांनी छत्रपती शिवाजी चौक येथे सभा घेऊन परत नाशिककडे रवाना झाले त्यामुळे गोकुळचे ज्येष्ठ संचालक विश्वास पाटील यांचा शनिवारी होणारा पक्षप्रवेशाचा कार्यक्रम झाला नाही. 

 दरम्यान गोकुळ दूध संघाचे ज्येष्ठ संचालक विश्वास नारायण पाटील यांच्यासह करवीर तालुक्यातील अन्य पक्षातील ज्येष्ठ कार्यकर्त्यांचा शिवसेना पक्षप्रवेश मुंबई येथे उपमुख्यमंत्री  शिंदे यांच्या उपस्थितीत लवकरच घेण्यात येणार असल्याची माहिती करवीरचे आमदार चंद्रदीप नरके यांनी दिली.उपमुख्यमंत्री  शिंदे यांनी कोल्हापूर विमानतळावर विश्वास पाटील यांची भेट घेऊन सध्या  राज्यातील महानगरपालिका निवडणुकीची धामधूम सुरू असल्याने आणि शनिवारी रात्री उशिरा नाशिक येथे जाहीर सभा असल्याने वेळेअभावी कार्यक्रम घेता आला नसल्याचे सांगितले. महाराष्ट्रातील महानगरपालिकेच्या निवडणुकीची धामधूम संपल्यानंतर मुंबईत विश्वास पाटील यांच्यासह अन्य सर्व कार्यकर्त्यांचा यथोचित सन्मान करून मुंबईमध्ये  कार्यक्रमाद्वारे त्यांचा शिवसेना पक्ष प्रवेश घेण्यात येणार असल्याचे त्यांनी सांगितले.

       विश्वास पाटील यांच्या शिवसेना पक्षप्रवेशामुळे त्यांच्यासारखे ज्येष्ठ नेते आणि अन्य पक्षातील कार्यकर्ते शिवसेनेत येण्यामुळे शिवसेनेला बळकटी मिळणार आहे. त्याचबरोबर आगामी जिल्हा परिषद ,पंचायत समिती आणि गोकुळ दूध संघाच्या निवडणुकीत त्यांच्या शिवसेनेतील प्रवेशामुळे नक्कीच फायदा होणार आहे. त्यामुळे येत्या १६ जानेवारीनंतर मुंबईत त्यांच्यासह अन्य सर्व पक्षाच्या कार्यकर्त्यांचा यथोचित सन्मान करून पक्षप्रवेश करण्यात येणार आहे.दरम्यान शनिवारी सायंकाळी कोल्हापूर विमानतळावर उपमुख्यमंत्री एकनाथ शिंदे यांनी विश्वास पाटील यांचा बुके देऊन सत्कार केला. दरम्यान गोकुळचे ज्येष्ठ संचालक श्वास पाटील यांचा शनिवारी शिवसेनेत पक्षप्रवेश होणार असल्यामुळे कोल्हापुरातील मार्केट यार्ड समोरील एका हॉटेलमध्ये कार्यक्रमाची तयारी करण्यात आली होती. दुपारी साडेचार वाजता उपमुख्यमंत्री शिंदे यांच्या उपस्थितीमध्ये त्यांचा पक्षप्रवेश होणार होता. यासाठी दुपारी तीन वाजल्यापासूनच संचालक पाटील यांचे समर्थक व कार्यकर्ते हॉटेलमध्ये दाखल झाले होते. सायंकाळी साडेपाच सहा वाजण्याच्या सुमारास  संचालक विश्वास पाटील हे हॉटेलमध्ये पोहोचले. सात वाजेपर्यंत हॉटेलमध्ये उपमुख्यमंत्री एकनाथ शिंदे पोहोचतील असा निरोप होता. सगळ्या कार्यक्रमाची तयारी पूर्ण झाली होती. दरम्यान सायंकाळी सात वाजण्याच्या सुमारास उपमुख्यमंत्री शिंदे कोल्हापूर विमानतळावर पोहोचले. तेथून ते थेट छत्रपती शिवाजी चौक येथील शिवसेनेच्या सभेकडे रवाना झाले. दरम्यान गोकुळचे संचालक अजित नरके यांनी  गोकुळचे माजी अध्यक्ष विश्वास पाटील, त्यांचे पुत्र सचिन पाटील व सगळ्या समर्थक कार्यकर्त्यांना त्यांचा पक्षप्रवेशाचा कार्यक्रम कोल्हापूर विमानतळ येथे सव्वा आठ वाजण्याच्या सुमारास होईल असे सांगितले. सगळे कार्यकर्ते विमानतळाकडे रवाना झाले. दरम्यान उपमुख्यमंत्री शिंदे यांची नशिक येथे सभा होणार होती. या सभेसाठी शिंदे जाणार होते. त्यामुळे घाईगडबडीत पक्षप्रशाचा कार्यक्रम करण्यापेक्षा स्वतंत्रपणे कार्यक्रम घेण्याचे ठरले. कोल्हापूर विमानतळ येथे गोकुळचे संचालक विश्वास पाटील,  आमदार नरके व पालकमंत्री प्रकाश आबिटकर यांची उपमुख्यमंत्री शिंदे यांच्यासोबत चर्चा झाली. याप्रसंगी उपमुख्यमंत्री शिंदे यांनी गोकुळचे संचालक पाटील यांना घाईगडबडीत पक्षप्रवेशाचा कार्यक्रम घेण्यापेक्षा मुंबईमध्ये मोठ्या कार्यक्रमात पक्षप्रवेशाचा कार्यक्रम करू असे सांगितले. महापालिका निवडणुकीनतर मुंबईत पक्षप्रवेशाचा कार्यक्रम घेण्याचे ठरले.