महाराष्ट्र न्यूज वन प्रतिनिधी, कोल्हापूर : ‘छत्रपती शिवाजी महाराज आणि राजर्षी शाहू महाराज या दोन्ही राजांमध्ये जनतेविषयी अपार करुणा, प्रेम व लोकल्याणकारी राज्यकारभाराचे साम्य आहे. या महापुरुषांचे चरित्र वाचताना प्रत्येक वेळी नवा अन्वयार्थ आढळतो. या राजांची थोरवी, कर्तबगारी नव्या पिढीपर्यंत पोहोचविण्यासाठी साहित्यिक, लेखकांनी गोष्टीरुपात, सहजसोप्या भाषेत रसाळवाणीने लेखन करावे. महत्वाचे म्हणजे प्रत्येकाच्या घरी महापुरुषांचे चरित्र ग्रंथ असायला हवेत. यासाठी एक मिशन म्हणून विवाहात अक्षता  वाटप करताना त्यासोबत राजर्षी शाहू महाराज यांच्यावरील पुस्तक आणि रुखवतासोबत पुस्तकाचे कपाट द्या..’असे आवाहन ज्येष्ठ इतिहास संशोधक डॉ. जयसिंगराव पवार यांनी केले.

शिवाजी विद्यापीठाच्या मराठी अधिविभागाचे प्रमुख डॉ. नंदकुमार मोरे यांनी लिहीलेल्या ‘असे होते आपले शाहू महाराज’ या चरित्रग्रंथासह त्याच्या इंग्रजी, हिंदी, कन्नड आणि गुजराती अनुवाद ग्रंथांचेही आज राजर्षी छत्रपती शाहू महाराज यांच्या जयंतीनिमित्त डॉ. पवार यांच्या हस्ते प्रकाशन करण्यात आले. कार्यक्रमाच्या अध्यक्षस्थानी कुलगुरू डॉ. दिगंबर शिर्के होते, तर प्र-कुलगुरू डॉ. प्रमोद पाटील प्रमुख उपस्थित होते. इतिहास अधिविभागाच्या वतीने कार्यक्रमाचे संयोजन करण्यात आले. डॉ. पवार म्हणाले, डॉ. नंदकुमार मोरे यांच्या चरित्रग्रंथाच्या माध्यमातून या करुणासागराच्या संस्कारकथा बालकुमारांपर्यंत पोहोचणार आहेत, याचा मोठा आनंद वाटतो. एकाच वेळी एकाच पुस्तकाच्या मराठीसह पाच भाषांतील अनुवाद प्रकाशित होण्याची विद्यापीठाच्या इतिहासातील पहिलीच वेळ आहे. ‘असे होते आपले शाहू महाराज’ हे पुस्तक शिवाजी विद्यापीठामार्फत बालकुमारांसाठी प्रकाशित होणे ही अभिनव घटना आहे.

लेखक डॉ. नंदकुमार मोरे म्हणाले, शाहू महाराजांच्या या चरित्रग्रंथावर काम करीत असताना त्यांचे अनेक पैलू सामोरे आले. बुद्धापासून ते कबीर, तुकाराम, महात्मा गांधी, विनोबा भावे या साऱ्यांची आठवण झाली. एक तत्त्वचिंतक म्हणून राजर्षी शाहू महाराज सामोरे आलेच, पण त्याचबरोबर आईचे हृदय असणारा ममताळू माणूस म्हणूनही ते भावले. कुलगुरू डॉ. दिगंबर शिर्के म्हणाले, शाहू महाराजांचा हा चरित्रग्रंथ म्हणजे मराठी साहित्य, इतिहास आणि कला यांचा त्रिवेणी संगम आहे. शिक्षणाच्या प्रथामिक पायरीपासून उच्चशिक्षणापर्यंत सर्वच स्तरांसाठी विद्यापीठांनी सहसंबंध प्रस्थापित केले पाहिजेत, ते दृढ करीत राहिले पाहिजेत, याचे अधोरेखन करणारा हा प्रकल्प ठरला आहे. पुस्तकाच्या हिंदी आवृत्तीचे अनुवादक डॉ. गोरख थोरात, चित्रकार अन्वर हुसेन यांनी या प्रकल्पाचे काम करीत असताना आपण संपूर्णपणे शाहूमय होऊन गेल्याची भावना व्यक्त केली. इतिहास अधिविभागाचे प्रमुख डॉ. अवनीश पाटील यांनी प्रास्ताविक केले. प्रांजली क्षीरसागर यांनी सूत्रसंचालन केले. कुलसचिव डॉ. विलास शिंदे यांनी आभार मानले.

..........................

ग्लिम्प्सेस ऑफ राजर्षी शाहू महाराज’ चा मराठी अनुवाद

शिवाजी विद्यापीठाचे माजी कुलगुरू प्राचार्य रा.कृ. कणबरकर यांचे ‘ग्लिम्प्सेस ऑफ राजर्षी शाहू महाराज’ हे इंग्रजी पुस्तक शिवाजी विद्यापीठाने प्रकाशित केले आहे. या पुस्तकाचा मराठी अनुवाद डॉ. धनंजय देवळालकर यांनी केला. त्यांच्या या ‘शाहू महाराजांचे दर्शन’ या अनुवादग्रंथाचे प्रकाशनही  करण्यात आले.