महाराष्ट्र न्यूज वन प्रतिनिधी :  राज्यातील सर्व माध्यमांच्या व सर्व व्यवस्थापनांच्या शाळांमध्ये शिक्षक, पालक, विद्यार्थी आणि माजी विद्यार्थ्यांमध्ये शाळेप्रती उत्तरदायित्वाची भावना निर्माण व्हावी, तसेच विद्यार्थ्यांना शिकण्यासाठी प्रेरणादायी व आनंददायी वातावरण मिळावे या उद्देशाने मुख्यमंत्री माझी शाळा सुंदर शाळा – टप्पा तीन हे अभियान तीन नोव्हेंबर ते ३१  डिसेंबर २०२५ या कालावधीत राबविण्यात येणार आहे. भारतरत्न डॉ. बाबासाहेब आंबेडकर आदर्श शाळा योजनेअंतर्गत या अभियानाची अंमलबजावणी करण्यात येणार आहे.

 जिल्ह्यातील सर्व व्यवस्थापनांच्या व सर्व माध्यमांच्या शाळांनी  अभियानात सहभागी होणे अपेक्षित आहे. या अभियानासाठी शाळांची विभागणी, शासकीय व स्थानिक स्वराज्य संस्थांच्या शाळा व उर्वरित इतर सर्व व्यवस्थापनांच्या शाळा अशा दोन वर्गवारीत करण्यात येत आहे. २४ ऑक्टोबर ते दोन नोव्हेंबर  हा कालावधी अभियानाच्या पूर्व तयारीसाठी असून सर्व शाळांनी  या अभियानात सहभागी  होण्यासाठी  नोंदणी करावी. तीन नोव्हेंबर रोजी औपचारिक कार्यक्रमाद्वारे अभियानाची सुरुवात होवून अभियानाचा कालावधी ३१ डिसेंबर रोजी पूर्ण होईल. एक जानेवारी  ते सात फेब्रुवारी 2026 या कालावधीत मूल्यांकनाची  प्रक्रिया होईल. अभियानाचे स्वरुप पुढीलप्रमाणे आहे. यामध्ये पायाभूत सुविधा ३८ गुण, शासन ध्येय धोरण अंमलबजावणी १०१ गुण,  शैक्षणिक संपादणूक - ६१ गुण असे २०० गुणापैकी गुणांकन करण्यात येईल. सहभागी शाळांचे केंद्र, तालुका व जिल्हास्तरावर विविध समित्यांमार्फत मुल्यांकन केले जाईल. अशी माहिती जिल्हा परिषदेच्या प्राथमिक शिक्षण विभागाच्यावतीने देण्यात आली.