महाराष्ट्र न्यूज वन प्रतिनिधी, कोल्हापूर : भारतीय जनता पक्षाचे माजी जिल्हाध्यक्ष व शाहू ग्रुपचे प्रमुख समरजितसिंह घाटगे यांच्या पत्नी नवोदिता घाटगे यांची तोतया अधिकाऱ्यांनी वीस लाख रुपयांची आर्थिफ फसवणूक केल्याचा प्रकार घडला आहे. मलेशियात पाठविण्यासाठी दिलेल्या पार्सलमध्ये अंमल पदार्थ व बनावट पासपोर्ट असल्याचे सांगत बोगस कस्टम अधिकारी व सीबीआय अधिकाऱ्यांनी वीस लाख रुपयांचा गंडा घातला आहे.यासंबंधी शाहूपुरी पोलिस ठाण्यात तीन संशियातवर गुन्हा दाखल करण्यात आला आहे.
दोन ते पाच जून २०२४ या कालावधीत हा फसवणुकीचा प्रकार घडला आहे. दोन जून रोजी नवोदिता घाटगे यांना मोबाइल करुन तुम्ही मलेशियात पाठविण्यासाठी जे पार्सल दिले होते, त्यामध्ये तुमच्या नावाचे बनावट पासपोर्ट, एटीएम कार्ड व अंमल पदार्थ आहे. आम्ही कस्टम अधिकारी आहोत. तुमच्या विरोधात कायदेशींर कारवाई होऊ शकते असे सांगण्यात आले. आणखी एका फोनवरुनही सीबीआयचे अधिकारी असल्याचे सांगत भिती घालण्यात आली. कारवाई टाळायची असेल तर पैसे द्यावे लागतील असे सांगत तब्बल वीस लाख रुपये ऑनलाइन पाठवावयास सांगितले. फसवणूक झाल्याचे कळताच घाटगे यांनी शाहूपुरी पोलिस ठाण्यात गुन्हा दाखल केला आहे.