महाराष्ट्र न्यूज वन प्रतिनिधी, कोल्हापूर : कोल्हापूर महानगरपालिकेच्या निवडणूक कामासाठी गैरहजर राहणाऱ्या अधिकारी  व कर्मचाऱ्यांवर फौजदारी दाखल करण्याचे आदेश महापालिकेच्या प्रशासक के. मंजुलक्ष्मी यांनी दिला. महापालिकेच्या निवडणुकीसंबंधी राज्य निवडणूक आयोगासोबत व्हिडिओ कॉन्फरन्स झाली. यानंतर, महापालिका प्रशासकांनी,  महापालिका निवडणुकीसाठी नेमलेल्या निवडणूक निर्णय अधिकारी व कर्मचाऱ्यांना कामकाजाबाबत सविस्तर मार्गदर्शन केले. दरम्यान निवडणूक कामासाठी  नियुक्त करण्यात आलेल्या कर्मचा-यांपैकी बरेचसे कर्मचारी अद्याप हजर झालेले नाहीत. त्यामुळे भरारी पथक, स्थिर पथक,  व्हिडीओ पडताळणी पथक  व निवडणूक कामकाजासाठी नियुक्त अधिकारी व कर्मचाऱ्यांनी वीस डिसेंबर २०२५ रोजी दुपारी बारा वाजेपर्यंत हजर राहावे, असे त्यांनी म्हटले. जे कर्मचारी हजर होणार नाहीत त्यांच्यावर कायदेशीर कारवाई करण्याच्या सूचना दिल्या. निवडणूक कामगिरीस शनिवारपर्यत जे हजर राहणार नाहीत त्या  अधिकारी व कर्मचाऱ्यांवर फौजदारी कारवाई करण्यात यावी, असे आदेश प्रशासकांनी निवडणूक निर्णय अधिकाऱ्यांना दिले. तसेच निवडणूक काळात आचारसंहितेचे काटेकोरपणे पालन करण्याबाबत सर्व संबंधितांना सक्त सूचना देण्यात आल्या आहेत. या बैठकीला यावेळी अतिरिक्त आयुक्त रविकांत आडसूळ, निवडणुक निर्णय अधिकारी संदीप भंडारे, एकनाथ काळबांडे, शक्ती कदम, सुशिल संसारे, हरेश सुळ, समीर शिंगटे, श्रीमती रुपाली चौगुले, उप-आयुक्त किरणकुमार धनवाडे, मुख्य लेखापरिक्षक कलावती मिसाळ, निवडणूक अधिक्षक सुधाकर चल्लावाड आदी उपस्थित होते.