महाराष्ट्र न्यूज वन प्रतिनिधी, कोल्हापूर : कोल्हापूर महापालिका निवडणुकीसाठी निवडणूक निर्णय अधिकारी व सहायक निवडणूक निर्णय अधिकाऱ्यांच्या नियुक्त्या करण्यात आल्या आहेत. विभागीय आयुक्तांनी नियुक्तीचे आदेश काढले आहेत. निवडणूक निर्णय अधिकारी म्हणून करवीर पंचायत समितीचे गटविकास अधिकारी संदीप भंडारे, भूसंपादन विभागाच्या उपजिल्हाधिकारी श्रीमती रुपाली चौगुले, रोजगार हमी योजनेचे उपजिल्हाधिकारी शक्ती मारुती कदम, सातारा येथील गटविकास अधिकारी सुशील संसारे, आजरा भुदरगड येथील उपविभागीय अधिकारी हरेश सूळ, पन्हाळा येथील उपविभागीय अधिकारी समीर शिंगटे, गडहिंग्लज उपविभागीय अधिकारी एकनाथ काळबांडे यांची नियुक्ती केली आहे.  सहायक निवडणूक निर्णय अधिकारी म्हणून करवीरचे नायब तहसीलदार सुधीर वाघमारे, भालचंद्र यादव, जिल्हाधिकारी कार्यालयातील नायब तहसीलदार दिगंबर सानप, कागल येथील महसूल विभागाचे नायब तहसीलदार  सुशांत कांबळे, पन्हाळा येथील नायब तहसीलदार विजय जाधव, हातकणंगले येथील नायब तहसीलदार संदीप चव्हाण, शिरोळ येथील नायब तहसीलदार विनायक कौलवकर यांची नियुक्ती करण्यात आली आहे. दरम्यान महापालिकेचे अतिरिक्त आयुक्त रविकांत आडसूळ यांनी, निवडणूक निर्णय अधिकाऱ्यांच्यासाठी आवश्यक कार्यालयांची पाहणी केली.कामकाज सुरळीत पार पाडण्यासाठी आवश्यक मूलभूत सुविधा, जागेची उपलब्धता, तांत्रिक बाबी, सुरक्षेच्या दृष्टीने आवश्यक उपाययोजनांचा आढावा घेतला. हॉकी स्टेडियम, राजोपाध्येनगर बॅडमिंटन हॉल, दुधाळी मैदान, गांधी मैदान, शेठ रुईया विद्यालय, छत्रपती शिवाजी मार्केट, एलबीटी कार्यालयाची पाहणी केली. याप्रसंगी जल अभियंता हर्षजीत घाटगे, निवडणूक अधीक्षक सुधाकर चल्लावाड, कनिष्ठ अभियंता अक्षय काटकर, पर्यवेक्षक विजय माळी आदी उपस्थित होते.