महाराष्ट्र न्यूज वन प्रतिनिधी, कोल्हापूर  : कोल्हापूर महापालिका परवाना विभागाने प्रसिध्द केलेल्या प्रसिध्दीकरणास परवानाधारकांचा असलेला रोष लक्षात घेऊन आज अतिरिक्त आयुक्त राहुल रोकडे यांनी परवानाधारकांची बैठक बोलाविली होती. या बैठकीत बोलतांना चेंबरचे अध्यक्ष संजय शेटे यांनी २०२५-२०२६ साठी परवाना फी दरवाढबाबत परवाना विभागाने प्रसिध्द केलेले जाहीर प्रसिध्दीकरण ताबडतोब मागे घेण्याची मागणी केली. २०१७-२०१८ मध्ये ठराव करुन केलेली दरवाढ आहे तीच ठेवावी असे गेल्या ८ वर्षांपासून सांगत असून त्याचा विचार न करता परवाना विभागाने पुन्हा दरवाढ केल्याने परवानाधारकांमध्ये रोष असल्याचे सांगितले.

 याप्रसंगी अतिरिक्त आयुक्त  राहुल रोकडे यांनी परवाना फी दरवाढ मागे घेण्याबाबत प्रशासक के. मंजूलक्ष्मी यांच्या चर्चा करुन निर्णय देऊ असे सांगितले. तसेच परवाना फेरफार शिबिरातील माहिती १५ एप्रिल पर्यंत देण्याचे आदेश परवाना विभागाला दिले. दरम्यान चेंबर ऑफ कॉमर्सचे अध्यक्ष शेटे यांनी, परवाना फी दरवाढ मागे न घेतल्यास व फेरफार शिबिरांची माहीती न दिल्यास शहरातील एकही परवानाधारक आपला परवाना नूतनीकरण करणार नसल्याचा इशारा दिला. अजित कोठारी म्हणाले, नवीन परवाना घेताना परवान्याच्या तिप्पट ठेव ठेवावी लागते जी परत मिळणार नाही. ते देखील अत्यंत चुकीचे आहे. केमिस्ट असोसिएशनचे दाजिबा पाटील यांनी महापालिकेच्या प्रसिध्दीकरणात औषध विक्रेत्यांच्या फी मध्ये भरमसाठ वाढ केल्याचे दिसत असून ती दरवाढ मागे घ्यावी असे सांगितले. हॉटेल मालक संघाचे अध्यक्ष उज्वल नागेशकर यांनी लॉजिंग व बार साठी मोठी दरवाढ झाल्याचे निदर्शनास आणले. प्रवीण पाटील यांनीही चर्चेत सहभाग घेतला.

अतिरिक्त आयुक्त राहुल रोकडे यावेळी चेंबरचे उपाध्यक्ष धनंजय दु्ग्गे, मानद सचिव प्रशांत शिंदे, खजिनदार राहुल नष्टे, कापड व्यापारी संघाचे अध्यक्ष संपत पाटील, इलेक्ट्रॉनिक्स डिलर्स असोसिएशनचे अध्यक्ष अनिल धडाम, हॉटेल मालक संघाचे सचिन शानबाग, आशिष रायबागे, प्लायवूड डिलर्स असोसिएशनचे विनोद पटेल, असित पटेल, केमिस्ट असोसिएशनचे कपिल कुलकर्णी, वर्धमान रुईकर, राकेश मगदूम, महापालिका उपायुक्त पंडित पाटील उपस्थित होते.