शिरोली दुमालामध्ये महाकुंकूमार्चन सोहळा अमाप उत्साहात, उपासनेत हजारहून अधिक महिलांचा सहभाग
schedule04 Apr 25 person by visibility 63 categoryसामाजिक

महाराष्ट्र न्यूज वन प्रतिनिधी, कोल्हापूर : गेली ५० वर्ष राजकीय, सामाजिक, शिक्षण, कृषी, दुग्ध अशा विविध क्षेत्रात आपल्या कार्याचा ठसा उमटविणारे गोकुळ दूध संघाचे माजी चेअरमन आणि ज्येष्ठ संचालक विश्वास पाटील यांच्या ७५ व्या वाढदिवसानिमित्त ‘विश्वास पाटील अमृत महोत्सवी गौरव समिती’तर्फे शुक्रवारी सौभाग्य व सौख्यदायी श्री कुंकूमार्चन सोहळा आयोजित केला होता. करवीर तालुक्यातील शिरोली दुमाला येथे महिलांच्या अमाप उत्साहात हा कार्यक्रम झाला. एक हजारहून अधिक महिलांनी सहभाग घेतला. याप्रसंगी गोकुळचे ज्येष्ठ संचालक विश्वास पाटील यांना उपस्थित महिला भगिनींनी वाढदिवसाच्या शुभेच्छा दिल्या.
या सामुदायिक धार्मिक उपासनेत शिरोली दुमाला व परिसरातील एक हजारपेक्षा अधिक महिला सहभागी झाल्या होत्या. परिसरातील अनेक महिला पहाटे ५ वाजले पासून कार्यक्रमाच्या स्थळी उपस्थित होत्या. विधीतील सहभागी सर्व महिलांना श्री महालक्ष्मी यंत्र, पादुका, कुंकू व मोठी स्टीलची वाटी आदी पूजेचे साहित्य समितीमार्फत देण्यात आले. यावेळी वाटीमध्ये पादुका ठेवून त्यावर सलग १००० वेळा अंबाबाईचा नामजप करत कुंकूमार्चन केले. पुजारी देवदत्त जोशी व मेघ बांभोरीकर यांनी सौभाग्यप्राप्ती, सौभाग्यवृद्धी, सौभाग्यवर्धनासाठी कुंकूमार्चनाचे महत्व सांगितले.
अमृतमहोत्सवी वाढदिवस समितीच्या आवाहनानुसार या सोहळयात महिला वर्ग मोठ्या भक्तिभावाने सहभागी झाला होता. कार्यक्रमाला नंदकुमार पाटील, अनिल सोलापुरे, सरपंच सचिन पाटील, माधव पाटील, सुनिल पाटील, राहुल पाटील, सर्जेराव पाटील, उपसरपंच कृष्णात पाटील, सौ.उर्मिला पाटील, प्राजक्ता पाटील, राजश्री पाटील, बंदिनी पाटील, पल्लवी पाटील, नंदिनी पाटील, माधुरी जाधव, निर्मला निगडे उपस्थित होते.