महाराष्ट्र न्यूज वन प्रतिनिधी, कोल्हापूर : कोल्हापूर महानगरपालिका परवाना विभागाकडून २०२५-२६ या वर्षासाठी केलेली व्यवसाय परवानी फी दरवाढ कमी होणार असल्याची ग्वाही महापालिका उपायुक्त पंडित पाटील यांनी कोल्हापूर चेंबर ऑफ कामर्स अँड इंडस्ट्रीच्या शिष्टमंडळाला दिली. व्यवसाय परवानी फी दरवाढ कमी व्हावी यासाठी चेंबर ऑफ कॉमर्सचा पाठपुरावा सुरू होता.

कोल्हापूर चेंबर ऑफ कॉमर्स अँड इंडस्ट्रीजचे अध्यक्ष संजय शेटे म्हणाले, ‘व्यवसाय परवाना फी मध्ये केलेली दरवाढ अत्यंत चुकीची होती. ही दरवाढ ताबडतोब मागे घ्यावी असे सांगितले. तसेच औषध व्यवसाय हा अत्यावश्यक सेवेत मोडतो, कायद्यानुसार औषध व्यावसायीकांना अन्न व औषध प्रशासनाचा परवाना घ्यावा लागतो. त्यामुळे त्यांनी महानगरपालिकेचा परवाना घेणे आवश्यक नसून तो रद्द करावा.’

मानद सचिव अजित कोठारी यांनी ‘परवाना हे महापालिकेच्या उत्पन्नाचे स्त्रोत नसून व्यावसायीकाला व्यवसायसाठी दिलेला परवाना आहे. किरकोळ व्यावसायीकांना लागू केलेला अग्निशमन कर मागे घ्यावा. तसेच दरवाढ मागे घेणेबाबत निर्णय होत नाही तोपर्यंत ३० मे अखेर असलेली परवाना नूतनीकरणाची मुदत ३० जून पर्यंत वाढवून मिळावी’अशी मागणी केलीं. टिंबर व्यापारी संघाचे लक्ष्मण पटेल यांनी बाकीच्या महानगरपालिकेत टिंबर व्यवसायाची परवाना फी २५० ते ३०० रुपये आहे तीच फी कोल्हापूर महानगरपालिेकेत ८००० ते ९००० रुपयापर्यंत वाढ केली असून अशी अन्यायकारक फी आकारु नये असे सांगितले.

यावेळी उपायुक्त पंडित पाटील यांनी व्यवसाय परवाना फी मध्ये झालेली दरवाढ सरसकट मागे न घेता दरवाढ कमी करण्याचे आश्वासन देत जाहीर प्रसिध्दीकरणात नमूद केलेल्या सर्व व्यावसायीकांना सरसकट १० टक्के दरवाढ करणार अशी ग्वाही शिष्टमंडळाला दिली. तसेच परवाना विभागाने जाहीर केल्याप्रमाणे किरकोळ विक्री करणाऱ्या परवानाधारकांची अग्निशमन फी मागे घेण्याबाबत अग्निशमन विभागामार्फत कार्यवाही सुरु असल्याचे त्यांनी सांगितले. बैठकीला सराफ व्यापारी संघाचे अध्यक्ष राजेश राठोड, कापड व्यापारी संघाचे संपत पाटील, पेट्रोल पंप डिलर्स असोसिएशनचे कुशल पटेल, केमिस्ट असोसिएशनचे वर्धमान रुईकर औषध व्यावसायीक व कोल्हापूर महानगरपालिकेचे माजी स्टॅंडिंग चेअरमन महेश सावंत हॉटेल मालक संघाचे राजाभाऊ माळकर, रेडिओ इलेक्ट्रॉनिक्स डिलर्स असोसिएशनचे अनिल धडाम, टिंबर व्यापारी संघाचे विनोद पटेल, स्टेशनरी कटलरी असोसिएशनचे सुधीर आगरवाल, पानपट्टी असोसिएशनचे अरुण सावंत कोल्हापूर इंजिनिअरिंग असोसिएशनचे प्रदीप व्हरांबळे, परवाना अधिक्षक अशोक यादव उपस्थित होते.