महाराष्ट्र न्यूज वन प्रतिनिधी, कोल्हापूर : श्री संत ज्ञानेश्वर माऊली पालखी सोहळ्यात सहभागी होणाऱ्या वारकऱ्यांच्या सेवेसाठी कोल्हापूर जिल्हा सहकारी दूध उत्पादक संघातर्फे (गोकुळ) दरवर्षीप्रमाणे यंदाही सामाजिक जाणीवेने उपक्रम राबवण्यात आला. सातारा जिल्ह्यातील लोणंद व फलटण येथे वारकऱ्यांना दूध पावडर, पाच हजार बॅग, टोपी आणि दिनदर्शिका या साहित्याचे मोफत वाटप केले.

गोकुळचे चेअरमन नविद मुश्रीफ यांच्या हस्ते व माजी चेअरमन ज्येष्ठ संचालक विश्वास पाटील, अरुण डोंगळे, संचालक शशिकांत पाटील चुयेकर, बयाजी शेळके यांच्या उपस्थितीमध्ये हा कार्यक्रम झाला. याप्रसंगी  मुश्रीफ यांनी ‘पालखी सोहळा हा आपल्या सांस्कृतिक अस्मितेचा भाग आहे यामध्ये जिल्ह्यातील दूध उत्पादक वारकरी म्हणून सहभागी असतात, त्यामुळे या उपक्रमातून  त्यांच्यापर्यंत गोकुळची साथ पोहोचवणे, हे संघाचे सामाजिक कर्तव्य समजूनच हा उपक्रम राबवला जात आहे.’असे नमूद केले.

 यावेळी बिद्री साखर कारखान्याचे व्हाइस चेअरमन मनोज फराकटे, रयत संघाचे चेअरमन सचिन पाटील, माधव पाटील, सुनिल पाटील, राहुल पाटील, मयूर आवळेकर, निलेश शिंदे, मार्केटिंग व्यवस्थापक हणमंत पाटील, जनसंपर्क अधिकारी सचिन पाटील, मार्केटिंग विभागाचे सुनिल गायकवाड, मानसिंग चौगले उपस्थित होते.