महाराष्ट्र न्यूज प्रतिनिधी कोल्हापूर  : कुस्तीपटू,  कबड्डीपटू आणि राजकारणी म्हणून खासदार धनंजय महाडिक यांची ओळख. त्यांची खेळाची आणि व्यायामाची आवड तर साऱ्यांनाच माहित. संसदरत्न पुरस्कारानेही ते सन्मानित झालेले. मात्र त्यांची ओळख एवढ्या पुरतीच सीमित नाही. तर ते कलाकारही आहेत, सिनेमातही काम केले होते.  चित्रनगरी येथे झालेल्या कार्यक्रमात त्यांनी या संदर्भातील माहिती दिली.
कोल्हापूर चित्रनगरी येथे शनिवारी 28 जून 2025 रोजी विविध विकासकामांचे उद्घाटन व बहुमजली इमारतीचा भूमिपूजन समारंभ कार्यक्रम झाला. सांस्कृतिक कार्यमंत्री आशिष शेलार, पालकमंत्री प्रकाश आबिटकर, आमदार अमल महाडिक आमदार राहुल आवाडे, भाजपचे प्रदेश सचिव महेश जाधव महानगर जिल्हाध्यक्ष विजय जाधव, महाराष्ट्र चेंबर ऑफ कॉमर्स इंडस्ट्रीजचे अध्यक्ष ललित गांधी, भाजप महिला आघाडीच्या अध्यक्षा रूपाराणी निकम यांच्या उपस्थितीमध्ये हा कार्यक्रम झाला. या कार्यक्रमात बोलताना धनंजय महाडिक यांनी कोल्हापुरी ही कलानगरी आहे. सिनेमा इंडस्ट्री म्हणजे मोठे उद्योग क्षेत्र आहे. येथे अनेक घटकांना रोजगार मिळतो असे नमूद करत कोल्हापूरसाठी एक्टिंग स्कूल सुरू करावी. यामुळे कोल्हापूरच्या कलाक्षेत्रात आणखी चालना मिळेल अशी मागणी सरकारकडे केली. याचवेळी त्यांनी आपणही कलाकार आहोत. तरुणपणी सिनेमात काम केले आहे. कृष्णाच्या भूमिकेत होतो. त्या सिनेमात अभिनेत्री अलका कुबल होत्या.  कृष्णाच्या भूमिकेसाठी मला मिशा काढून टाकायला सांगितल्या. मला काही ते पटले नाही. आणि मी सिनेमापासून बाजूला झालो. पुढे राजकारणात आलो.
 राजकारणात काम करताना खूप समाधानी, आनंदी आहे. पंतप्रधान नरेंद्र मोदी, गृहमंत्री अमित शहा यांच्या मार्गदर्शनाखाली केंद्र सरकारची विविध विकास कामे कोल्हापूरसाठी आणू शकलो. विमानतळ विस्तारीकरण, रेल्वे स्टेशनचे सुशोभीकरण, बास्केट ब्रिज, कोल्हापूर शहरासाठी नवीन शंभर ई बसेस  यासाठी योगदान देत आले याचे समाधान मोठे आहे. असे महाडिक यांनी नमूद केले.