महाराष्ट्र न्यूज वन प्रतिनिधी कोल्हापूर : वर्षा पर्यटनासाठी आंबोली येथील कावळेसाद परिसरात गेलेल्या जिल्हा परिषद कर्मचारी राजेंद्र बाळासाहेब सनगर यांचा मृतदेह शनिवारी सापडला. कावळेसाद दरीत  दोनशे फूट खोल अंतरावर त्यांचा मृतदेह आढळला. एनडीआरएफचे पथक व गेळे ग्रामस्थांच्या मदतीने त्यांचा मृतदेह दरीतून बाहेर काढण्यात आला.
सनगर हे शुक्रवारी मित्रांच्या सोबत वर्षा पर्यटनासाठी आंबोली येथे गेले होते. जिल्हा परिषदेतील आठ कर्मचारी व इतर मित्र मिळून असे चौदा जण सोबत होते . शुक्रवारी ते कावळेसाद पॉईंट येथे फिरत असताना  रेलिंग वरून पाय घसरला. पाय घसरून ते  दरीत पडले. शुक्रवारी संध्याकाळी त्यांची शोधाशोध करण्यात आली. दाट धुके , अंधार यामुळे बचाव कार्यात अडथळे येत होते. त्यामुळे शुक्रवारी सायंकाळी शोधकार्य थांबवले होते. शनिवारी सकाळी पुन्हा शोध कार्याला सुरुवात झाली. एनडीआरएफचे पथक व गेळे ग्रामस्थ यांच्या मदतीने शोध मोहीम राबवली. दरीत दोनशे फूट अंतरावर त्यांचा मृतदेह आढळला. दरम्यान सनगर यांचे अपघाती निधन झाल्याचे वृत्त कळताच कोल्हापुरातून त्यांच्या मित्रपरिवाराने तिकडे धाव घेतली.

राजेंद्र सनगर हे जिल्हा परिषदेतील पशुसंवर्धन विभागात कनिष्ठ लिपिक होते. या महिन्यातच त्यांची करवीर पंचायत समितीमध्ये शिक्षण विभागात बदली झाली होती. दरम्यान त्यांचे पार्थिव शनिवारी (२८ जून) सायंकाळी ६.३० वाजता चिले कॉलनी येथील निवासस्थानी आण्ण्यात येणार आहे. त्यानंतर पंचगंगा स्मशानभूमी येथे अंत्यविधी केले जाणार आहेत.