महाराष्ट्र न्यूज वन प्रतिनिधी, कोल्हापूर : कामकाजावरुन नेहमीच वादग्रस्त ठरलेल्या कोल्हापूर विभागीय शिक्षण सहसंचालक कार्यालयावर राज्य सरकारच्या उच्च व तंत्रशिक्षण विभागाने अखेर अॅक्शन घेतली. विनाअनुदानितमधून अनुदानित सेवा दाखविणे, चुकीच्या पद्धतीने कॅसचे लाभ देणे, अर्जित रोखीकरणातील अनियमितता यावरुन शिक्षण सहसंचालक कार्यालयातील  तिघांवर निलंबनाची कारवाई करण्यात आली. निलंबन झालेल्या अधिकाऱ्यांमध्ये तत्कालिन सहसंचालक डॉ. धनराज नाकाडे, कनिष्ठ प्रशासन अधिकारी धैर्यशील कारीदकर, लिपिक बाबासाहेब बीडकर यांचा समावेश आहे. शिक्षण सहसंचालक कार्यालयाच्या कामकाजाच्या तपासणीसाठी शिक्षण संचालकांनी २१ एप्रिल २०२४ रोजी केशव तुपे आणि संदीप पाटील यांची द्विसदस्यीय  समिती नेमली होती. या समितीने तपासणी अहवाल मे २०२५ मध्ये दिला होता. समितीने विविध कामातील अनियमिततेला डॉ. नाकाडे, कारीदकर व बीडकर यांना प्रथमदर्शनी जबाबदार ठरविले आहे. उच्च व तंत्रशिक्षण विभागाने या तिघांवर निलंबनाची कारवाईचा आदेश २६ जून रोजी काढला. निलंबन कालावधीचा आदेश अमलात असेल तोपर्यंत त्यांनी परवानगीशिवाय कार्यालयाचे मुख्यालय सोडता येणार नाही असे आदेशात म्हटले आहे.