महाराष्ट्र न्यूज वन प्रतिनिधी, कोल्हापूर : कोल्हापूर सर्किट बेंचचे उद्घाटन १७ ऑगस्ट २०२५ रोजी होणार आहे. सर्किट बेंचच्या उद्घाटनसाठी सुप्रीम कोर्टाचे सरन्यायाधीश भूषण गवई उपस्थित राहणार आहेत. सरन्यायाधीश गवई यांचे जंगी स्वागत करण्याचे ठरले. उद्घाटन कार्यक्रमाच्या नियोजनासाठी १८ समित्या स्थापन केल्या आहेत. कोल्हापूर जिल्हा बार असोसिएशनची आढावा बैठक झाली.बार असोसिएशनचे अध्यक्ष व्ही. आर. पाटील बैठकीच्या अध्यक्षस्थानी होते. सरन्यायाधीश गवई यांना करवीर संस्थान काळातील हायकोर्टाच्या शिक्क्याची चांदीची प्रतिकृती व लोकराजा राजर्षी शाहू महाराज यांचा पुतळा भेट देण्यात येणार आहे. उद्घाटन सोहळा नेटका आणि दिमाखदार करण्याच्या दृष्टीने बार असोसिएशनच्या बैठकीत वकिलांनी वेगवेगळया सूचना केल्या. सर्किट बेंच स्थापनेच्या वाटचालीवर स्मरणिका प्रकाशित करण्याचे ठरले. या बैठकीला बार असोसिएशनचे उपाध्यक्ष पी. एस. पाडेकर, सहसचिव सूरज भोसले, लोकल ऑडिटर प्रमोद दाभाडे, महिला प्रतिनिधी मनिषा सातपुते, सचिव मनोज पाटील आदी उपस्थित होते.