महाराष्ट्र न्यूज वन प्रतिनिधी, कोल्हापूर : आरोप,प्रत्यारोपामुळे गाजलेल्या अखिल भारतीय मराठी चित्रपट महामंडळाच्या पंचवार्षिक निवडणुकीसाठी रविवारी, सात जून २०२६ रोजी मतदान झाले. महामंडळाच्या  ३४०३ सभासद मतदारापैकी १६९८ इतक्या मतदारांनी मतदानाचा हक्क बजावला. मतदानाची टक्केवारी ४९.९० टक्के इतकी आहे. कोल्हापूर आणि पुणे केंद्रावर चुरशीने मतदान झाले. दरम्यान सोमवारी, सकाळी नऊ वाजता राम गणेश गडकरी सभागृह येथे सकाळी नऊ  वाजता मतमोजणीला प्रारंभ होणार आहे. उमेदवार व त्यांच्या प्रतिनिधींनी आठ वाजता उपस्थित  राहावे असे आवाहन निवडणूक निर्णय अधिकारी रागिणी खडके यांनी केले.

महामंडळाच्या एकूण सतरा जागेसाठी निवडणूक जाहीर झाली होती. यापैकी अभिनेत्री गटातून वर्षा ऊसगावकर, संकलन गटातून विजय खोचीकर तर गायक गटातून आनंद शिंदे यांची बिनविरोध निवड झाली. उर्वरत चौदा जागेसाठी ४४ उमेदवार रिंगणात होते. समर्थ पॅनेल व चित्रकर्मी पॅनेलमध्ये थेट लढत झाली. सोळा अपक्ष उमेदवार रिंगणात होते. कोल्हापूर, पुणे, नाशिक, मुंबई, सोलापूरमधील मिळून एकूण बारा केंद्रावर मतदान झाले.कोल्हापूर केंद्रातील एकूण ७४० मतदारापैकी  ५१७ मतदारांनी मतदान केले. कोल्हापुरातील मतदानाची टक्केवारी ६९.८६ टक्के आहे. कोल्हापूर केंद्रावर सकाळपासूनच मतदानासाठी चुरस पाहावयास मिळाली. पुणे केंद्रातील ७२९ मतदारापैकी ४६० मतदारांनी मतदान केले. मतदानाची टक्केवारी ६३.१० टक्के इतकी आहे. सोलापूर केंद्रातील १०७ पैकी ६३ जणांनी मतदानाचा हक्क बजावला. मुंबईत सर्वाधिक मतदार आहेत. १५७३ मतदारापैकी केवळ ५३९ मतदारांनी मतदान केले. मुंबईतील मतदानाची टक्केवारी ३७.६४ टक्के इतकी आहे. नाशिक येथे २५४ मतदार आहेत. त्यापैकी ११९ जणांनी मतदान केले.

यंदाची निवडणूक आरोप, प्रत्यारोपामुळे गाजली. सत्ताधारी समता पॅनेलचे नेतृत्व मेघराज भोसले, अभिनेता सुशांत शेलार, संजय ठुबे  यांनी केले. चित्रकर्मी पॅनेलची धुरा नेतृत्व सतीश रणदिवे, आनंद काळे, पितांबर काळे, अभिनेत्री वर्षा ऊसगावकर, रणजीत जाधव, विजय शिंदे यांनी सांभाळली. नृत्य दिग्दर्शक संग्राम भालकर, कलादिग्दर्शक सुनील घोरपडे, संतोष शिंदे, अवधूत जोशी यांनी अपक्ष म्हणून लढले.