आप्पासाहेब माळी, महाराष्ट्र न्यूज वन : शिक्षक म्हणजे केवळ नोकरी नव्हे तर शिक्षण क्षेत्राची सेवा, विद्यार्थ्यांची जडणघडण या वृत्तीने काम करतात. ज्ञानार्जनाचा वसा आयुष्यभर चालवितात. अशा शिक्षक वर्गात शोभणारे व्यक्तिमतव् म्हणजे प्रा. विनय गजानन पाटील ! मात्र त्यांची ओळख इतक्यापुरतीच सिमीत नाही. विद्यार्थीप्रिय शिक्षक, उत्तम वाचक, वक्ते आणि प्रगतशील शेतकरी म्हणून ते सर्वपरिचीत आहेत. शिक्षण आणि शेती या दोन्ही क्षेत्रात उत्कृष्टतेची पेरणी करण्यावर त्यांचा भर राहिला.

 येथील महाराष्ट्र हायस्कूल अँड ज्युनिअर कॉलेजमधील तब्बल ३६ वर्षाच्या शिक्षकी सेवेनंतर येत्या ३१ मे २०२६ रोजी ते सेवानिवृत्त होत आहेत. त्यांच्या शैक्षणिक, सामाजिक, शेती, क्रीडा अशा विविध क्षेत्रातील कार्याचा गौरव म्हणून १७ एप्रिल २०२६ रोजी सत्कार सोहळा आयोजित केला आहे. कळंबा येथील अमृतसिद्धी सांस्कृतिक भवन येथे शुक्रवारी, सायंकाळी ४.३० वाजता मान्यवरांच्या उपस्थितीमध्ये त्यांचा सपत्नीक गौरव होणार आहे. यानिमित्त प्रा. पाटील यांच्या आतापर्यंतच्या वाटचालीतील विविध पैलू उलगडताना शिक्षण क्षेत्रातील हा आयडॉल्स समोर उभा राहतो.

१९९० मध्ये ते, महाराष्ट्र हायस्कूल अँड ज्युनिअर कॉलेजमध्ये किमान कौशल्य व्यावसायिक अभ्यासक्रमाकडे ऑटो इंजिनीअरिंग विभागात प्राध्यापक म्हणून रुजू झाले. त्यांनी शिक्षकी पेशा केवळ नोकरी म्हणून स्वीकारला नाही. तर शिक्षण हे व्रत मानून काम केले. आपसूकच ते विद्यार्थीप्रिय शिक्षक बनले.किमान कौशल्य विभागाचे प्रमुख म्हणून कुशलतेने काम पाहिले. शेकडो विद्यार्थ्यांना टू व्हिलर मेकॅनिक व्यवसायात उतरविण्यासाठी आर्थिक पाठबळ दिले. शिक्षण आणि शेती असा दुहेरी वारसा त्यांना लाभला.त्यांचे वडील, गजानन बळवंत पाटील हे गोटखिंडीतील प्रगत शेतकरी. कृषिभूषण पुरस्कारांनी सन्मानित. तर प्रा. पाटील यांचे चुलते म्हणजे श्री प्रिन्स शिवाजी मराठा बोर्डिंग हाऊसचे माजी चेअरमन व महाराष्ट्र हायस्कूलचे माजी मुख्याध्यापक डी. बी. पाटील.