महाराष्ट्र न्यूज वन प्रतिनिधी कोल्हापूर  : कोल्हापूर जिल्हा सहकारी दूध उत्पादक संघाच्या अवसायानातील  प्राथमिक दूध संस्थांच्या पात्रतेवरून गोकुळच्या राजकारणाला चांगलीच उकळी आली आहे. भारतीय जनता पक्ष आणि राष्ट्रवादी काँग्रेस अजित पवार पक्ष यांच्यामध्ये या प्रकरणावरून शह-काटशहाचे राजकारण सुरू आहे. भारतीय जनता पक्षाचे आमदार शिवाजी पाटील यांनी दुग्ध  विभागाचे सहाय्यक निबंधक सुजय कदम हे मंत्री हसन मुश्रीफ यांच्या समर्थकांचे  नातेवाईक आहेत असा आरोप दोन दिवसांपूर्वी केला होता. आमदार पाटील यांनी याप्रकरणी मुख्यमंत्री देवेंद्र फडणवीस यांच्याकडे तक्रार करणार असल्याचे सांगितले होते. आमदार पाटील यांनी आरोप करून दोन दिवस उलटण्याअगोदरच सहाय्यक निबंधक कदम यांची बदली करण्यात आली आहे. त्यांच्या जागी कृष्णा सखाराम ठाकरे हे दुग्ध विभागाचे सहाय्यक निबंधक असतील. ठाकरे हे सध्या शाहूवाडी येथे सहकारी संस्था सहाय्यक निबंधक म्हणून काम करत होते. दरम्यान गोकुळशी संलग्नित सध्या बाराशेहून अधिक प्राथमिक दूध संस्थांच्या सुनावण्या सुरू आहेत. गर्जन संघटनेचे प्रकाश बेलवाडे यांनी या संस्था अपाञ ठरवाव्यात अशी तक्रार सहकार विभागाकडे केली आहे. आतापर्यंत साडेतीनशेहून अधिक दूध संस्थांच्या सुनावणी  झाले आहेत. त्यापैकी अडीशेच्या आसपास प्राथमिक दूध संस्थांच्या सुनावणीचा निकाल संबंधितांना कळविला आहे. दरम्यान आमदार शिवाजी पाटील यांनी याप्रकरणी तक्रार केल्यानंतर सहाय्यक निबंधक कदम यांना मंत्रालयात बोलावण्यात आले होते. कदम हे गुरुवारी दुपारीच मुंबईतून कोल्हापुरातील कार्यालयात दाखल झाले होते. दरम्यान गेले दोन दिवस सुनावण्यात थांबल्यामुळे गुरुवारी दुपारी प्राथमिक दूध संस्थांच्या प्रतिनिधींनी सहायक निबंधकाच्या कार्यालयावर मोर्चा काढला होता. यामध्ये कागल आणि चंदगड तालुक्यातील प्राथमिक दूध संस्था प्रतिनिधींचा सहभाग होता.