महाराष्ट्र न्यूज वन प्रतिनिधी, कोल्हापूर महात्मा बसवेश्वर आर्थिक विकास महामंडळास स्वायत्त दर्जा मिळावा व भरीव निधी उपलब्ध करुन द्यावा या मागणीसाठी समस्त लिंगायत समाजातर्फे रविवारी (९ ऑगस्ट २०२६) कोल्हापुरात जिल्हाधिकारी कार्यालयासमोर धरणे आंदोलन व साखळी उपोषण करण्यात येणार आहे. सकाळी ११ वाजता आंदोलनाला सुरुवात होईल. लोकशाही मार्गाने, शांततेने हे आंदोलन होणार आहे. मुख्यमंत्री देवेंद्र फडणवीस यांना समाजाच्या मागण्यांचे निवेदन देण्यात येणार आहे अशी माहिती संजय तेलनाडे, प्रशांत शहापुरे, सरला पाटील यांनी पत्रकार परिषदेत दिली. महाराष्ट्रातील लिंगायत समाजाच्या प्रलंबित मागण्यांबाबत हे आंदोलन आहे. या आंदोलनात समाजबांधवानी सहभागी व्हावे असे आवाहनही करण्यात आले. लिंगायत समाजास  महाराष्ट्रात धार्मिक अल्पसंख्याक जाहीर करावे. महात्मा बसवेश्वर आर्थिक विकास महामंडळास स्वायत्त दर्जा देऊन एक हजार कोटी रुपयांची तरतूद करावी तसेच विनातारण कर्ज योजना  लागू करावी अशी मागणी करण्यात आली. पत्रकार परिषदेला राजशेखर तंबाखे,सुभाष महाजन, नितीन पाटील, मनोजकुमार रणदिवे, मिलिंद साखरपे चारुशीला तासगावे आदी उपस्थित होते.