महाराष्ट्र न्यूज वन प्रतिनिधी, कोल्हापूर : कोल्हापूर महापालिका निवडणुकीत महाविकास आघाडीसोबत राहून एकत्रित लढायचे की स्वतंत्रपणे सामोरे जायचे याचा निर्णय शिवसेना ठाकरे पक्षातर्फे बुधवारी, २४ डिसेंबर २०२५ रोजी होणार आहे. महापालिका निवडणुकीच्या अनुषंगाने शिवसेना ठाकरे पक्षाच्या पदाधिकाऱ्यांची मंगळवारी, सायंकाळी हॉटेल अयोध्या येथे बैठक झाली. काँग्रेसकडून सन्मानजनक जागा मिळाल्या तर महाविकास आघाडीसोबत राहायचे आणि सन्मानजनक जागा मिळाल्या नाहीत तर स्वतंत्रपणे लढायचे का यासंबंधी चर्चा झाली. यासंबंधीचा अंतिम निर्णय हा पक्षप्रमुख उद्धव ठाकरे घेणार आहेत. त्यांना मंगळवारी बैठकीत झालेल्या चर्चेचा अहवाल सादर करण्यात येणार आहे. दरम्यान जागा वाटपासंबंधी शिवसेना संपर्कप्रमुख अरुण दुधवडकर हे बुधवारी, काँग्रेसचे जिल्हाध्यक्ष सतेज पाटील यांच्याशी चर्चा करणार आहेत.

 मंगळवारी झालेल्या बैठकीत सर्व इच्छुक उमेदवारांची मते व भूमिका दुधवडकर यांनी जाणून घेतली. या बैठकीस उपनेते संजय पवार, जिल्हाप्रमुख रविकिरण इंगवले, सह संपर्कप्रमुख विजय देवणे, शहरप्रमुख सुनील मोदी, उत्तर विधानसभा प्रमुख विशाल देवकुळे, महिला संघटिका प्रतिज्ञा उत्तुरे, युवा अधिकारी मंजीत माने तसेच इतर पदाधिकारी उपस्थित होते. संपर्कप्रमुख दुधवडकर यांनी इच्छुक उमेदवारांशी स्वतंत्रपणेही चर्चा केली. दरम्यान महाविकास आघाडीचे नेते आमदार सतेज पाटील यांच्यासोबत युतीबाबत अंतिम चर्चा बुधवारी करण्यात येणार आहे. पक्षाला सन्मानजनक जागा मिळाल्या, तर महाविकास आघाडीसोबत युती करण्यात येईल. अन्यथा, बैठकीतील सर्व अहवाल पक्षप्रमुख  ठाकरे यांच्याकडे सादर करण्यात येऊन त्यांच्या अंतिम आदेशानुसार पुढील निर्णय घेण्यात येईल, असे बैठकीत एकमताने ठरविण्यात आले.

………………..

दहा जागाबाबत तोडगा निघण्याची शक्यता