महाराष्ट्र न्यूज वन प्रतिनिधी, कोल्हापूर : राधानगरी तालुक्यातील कसबा वाळवे येथील मंडल अधिकारी कुलदीप शिवराम जनवाडे यांना २७ हजार रुपयांची लाच स्वीकारताना लाचलुचपत प्रतिबंधक विभागाने अटक केली. जनवाडे हे कोल्हापुरातील फुलेवाडी रिंग रोड, अरुण सरनाईकनगर, क्रांतीसिंह नाना पाटीलनगर येथील आहेत. सात-बारा पत्रकी नाव लावण्यासाठी जनवाडे यांनी तक्रारदारांकडे दहा हजार रुपयांची लाच मागितली होती. तक्रारदाराने १९ डिसेंबर रोजी यासंबंधी लाचलुचपत प्रतिबंधक विभागाकडे तक्रार दाखल केली होती.त्यांच्या तक्रारीनुसार पोलिसांनी, १९ व २० डिसेंबरला पडताळणी केली. पोलिसांनी तक्रारीनुसार सापळा लावला.२३ डिसेंबर रोजी मंडल अधिकारी जनवाडे हे तक्रारदारांकडून दहा हजारपैकी सात हजार रुपये व अन्य चार प्रकरणासाठी वीस हजार रुपयांची लाच स्वीकारताना पकडले. तसेच जनवाडे यांचा मोबाइलही जप्त केला आहे. राधानगरी पोलिस ठाण्यात गुन्हा दाखल करण्यात आला आहे. जनवाडे यांच्या कोल्हापुरातील निवासस्थानाची झडती घेतली जात आहे. या कारवाईत पोलिस निरीक्षक उज्ज्वला भडकमकर, प्रकाश भंडारे, विकास माने, सचिन पाटील, उदय पाटील यांनी  सहभाग घेतला.