महाराष्ट्र न्यूज वन प्रतिनिधी, कोल्हापूर   : कोल्हापूर जिल्हा सहकारी दूध उत्पादक संघाच्या निवडणुकीत महायुतीचे पॅनेल निश्चित विजयी होणार असा विश्वास मंत्री हसन मुश्रीफ यांनी व्यक्त केला. त्याचवेळी मंत्री मुश्रीफ यांनी,‘गोकुळच्या निवडणुकीसाठी महायुतीचे पॅनेल हे मुख्यमंत्री देवेंद्र फडणवीस सांगतील तसे होईल.’असे स्पष्ट केले. ते, सोमवारी, (१३ जुलै २०२६) कोल्हापुरात पत्रकारांशी बोलत होते. सध्या गोकुळच्या निवडणुकीची धामधूम सुरू आहे. ठराव दाखल करण्याची प्रक्रिया पूर्ण झाली आहे. येत्या काही दिवसात गोकुळसाठी मतदार यादी घोषित होईल. दरम्यान, महायुती व महाविकास आघाडीतील नेतेमंडळीत आरोप, प्रत्यारोपही रंगले. गोकुळचे माजी चेअरमन अरुण डोंगळे यांनी, ‘ माजी चेअरमन विश्वास पाटील हेच गोकुळचे बाप आहेत.’असे विधान केले होते. त्यासंबंधीही पत्रकारांनी मुश्रीफ यांच्याकडे विचारणा केल्यावर ते म्हणाले,‘ स्वर्गीय आनंदराव पाटील चुयेकर हेच गोकुळचे बाप आहेत.’असे स्पष्ट केले. महायुतीतील भाजपचे आमदार शिवाजी पाटील यांनी, गोकुळच्या कामकाजावरुन मंत्री मुश्रीफ यांच्यावर निशाणा साधत आहेत. याकडे लक्ष वेधले असता मंत्री मुश्रीफ यांनी राजकारणात संयम महत्वाचा असतो. अजून पुलाखालून बरेच पाणी वाहून जायचे आहे.’असा सूचक इशाराही दिला.