युवतीस आत्महत्येस प्रवृत्त करणाऱ्या आरोपीला पाच वर्षे सक्त मजुरी
schedule04 Dec 23 person by visibility 554 categoryगुन्हे
महाराष्ट्र न्यूज वन प्रतिनिधी, कोल्हापूर :
एकतर्फी प्रेमातून युवतीला आत्महत्या करण्यास प्रवृत्त केल्याप्रकरणी आरोपी देऊ बजू बोडके (वय २६ रा. धनगर वसाहत, बोंद्रेनगर, फुलेवाडी) याला जिल्हा व सत्र न्यायाधीश एस. एस. जगताप यांनी पाच वर्षे सक्त मजुरीची शिक्षा ठोठावली. या खटल्यात अॅडव्होकेट मंजुषा पाटील यांनी सरकारी वकील म्हणून काम पाहिजे.
या खटल्याची माहिती अशी की, फुलेवाडी रिंगरोड बोंद्रेनगर धनगर वसाहतीमध्ये गरीब कुटुंबातील महिला धुण्याभांड्याची कामे करतात. या खटल्यातील १९ वर्षाची युवती आजी आणि बहिणी सोबत राहत होती. तीही धुण्या भांड्याची कामे करत होती. धुण्याभांड्याच्या कामानिमित्त ती बाहेर जात असे. आरोपी देऊ बोडके, त्याचा मित्र चौडू बोडके, राजू सोनबा शेळके, संजय सोनबा शेळके, पांडुरंग बाबू शेळके, बबन नागू शेळके ही मुले कामधंदा न करता दिवसभर टिंगल टवाळी करत असत. आरोपी देऊ बोडके हा युवतीचा सातत्याने पाठलाग करत असे. ती कामाला जात असलेल्या नागाळा पार्क परिसरात जाऊन तिला अडवून 'तू माझ्याशी लग्न कर, नाहीतर तुला संपवणार' अशी धमकीही दिली होती.
देऊ बोडके याच्या सातत्याने होत असणाऱ्या धमकीमुळे युवतीने १९ जून २०१६ रोजी राहत्या घरी आत्महत्या केली. या प्रकरणी करवीर पोलीस ठाण्यात गुन्हा नोंद झाला. तत्कालीन पोलीस उपनिरीक्षक राजेंद्र अशोक सानप यांनी तपास करून कोर्टात आरोपपत्र सादर केले.
न्यायमूर्ती एस. एस. जगताप यांच्यासमोर या खटल्याची सुनावणी झाली. सरकारी वकील मंजुषा पाटील यांनी दहा साक्षीदार तपासले. मयत युवतीची चुलत बहीण, नातेवाईक राजाराम शेळके, पांडुरंग बोडकर राजाराम बोरकर, यांच्या साक्षी महत्त्वाच्या ठरल्या. मयत युवतीची मैत्रीण व जवळचे नातेवाईक या खटल्यात फितूर झाले. साक्षीदारांचा जाबजबाब , पुरावा आणि सरकारी वकिलांचा युक्तिवाद ग्राह्य मानून न्यायाधीश जगताप यांनी आरोपी देऊ बोडके याला पाच वर्षे सक्त मजुरीची शिक्षा ठोठावली.
