महाराष्ट्र न्यूज वन प्रतिनिधी   कोल्हापूर   :    रविवारी २८ जून 2026 रोजी होणाऱ्या  महाराष्ट्र शिक्षक पात्रता परीक्षेसाठी प्रशासकीय यंत्रणा सज्ज झाली आहे. केंद्रसंचालक, सहाय्यक परिरक्षक, झोनल अधिकारी यांचे प्रशिक्षण जिल्हा टीईटी परीक्षा समन्वयक आणि विस्तार अधिकारी डॉ.विश्वास सुतार, परीक्षा नियंत्रक आणि प्राथमिक शिक्षणाधिकारी डॉ.मीना शेंडकर यांनी दिले . केंद्रसंचालक आणि सहाय्यक परिरक्षक यांना परीक्षेचे गांभीर्य, बारकावे समजावून सांगितले.  प्रशिक्षणस्थळी जिल्हाधिकारी डॉ.विजय राठोड यांनी  भेट देवून सूचना केल्या. मुख्य कार्यकारी अधिकारी डॉ.जस्मिन यांनी भेट देऊन संपूर्ण परीक्षा पद्धतीची माहिती घेऊन केंद्रसंचालक आणि सहाय्यक परिरक्षक यांना दक्ष राहून सहकार्य करण्याचे आवाहन केले. ५४ केंद्रासाठी ५४ केंद्रसंचालक, १३ झोनल अधिकारी, ५४ सहाय्यक परिरक्षक, १२३ नियुक्त पर्यवेक्षक, ६६७ समवेक्षक, ९३ लिपिक, ९३ परिचर, एक जिल्हा परिरक्षक आणि केंद्र निहाय शिपाई अशी पर्यवेक्षकीय यंत्रणा सज्ज झाली. परीक्षा सुनियंत्रीत वातावरणात पार पडावी यासाठी तीन भरारी पथकांची नियुक्ती केली असून मुख्य कार्यकारी अधिकारी डॉ.जस्मिन यांच्या आदेशानुसार प्रश्नपत्रिका  आणताना आणि नियोजित ठिकाणी नेताना जीपीएस प्रणाली कार्यान्वित होणार आहे . या परीक्षेसाठी १६८ दिव्यांग विद्यार्थी आहेत . सकाळी ८:३० वाजता फ्रिस्किंग होणार असून मेटल डिटेक्टर, फेस रिक्गनायझेशन याबरोबरच दुप्पटा, बुरखा, हिजाब, ओढणी, टोपी या गोष्टींना प्रतिबंध आहे. पेपर १ साठी सकाळी १०: १० नंतर आणि पेपर २ साठी दुपारी  २ वाजून १० मिनिटानंतर कुणालाही प्रवेश असणार नाही . पर्यवेक्षकीय यंत्रणेच्या ओळखपत्रास वेगवेगळे रंग असून दोन सत्रात होणाऱ्या प्रश्नपत्रिकेसदेखील विषयनिहाय वेगवेगळे रंग आहेत.  सीसीटीव्ही संदर्भात अडचणींना समयोचित उत्तर दिले गेले .याप्रसंगी प्रशासन अधिकारी जयश्री जाधव, माध्यमिक शिक्षणाधिकारी सुवर्णा सावंत, प्राचार्य डॉ.रमेश होसकोटी, उपशिक्षणाधिकारी अजय पाटील, हणमंत बिराजदार, आर . आर . चौगुले, संजीव बाबर, केंद्रसंचालक संजय सौंदलगे, प्रमिला साजणे, माधवी सौंदलगे, आर .पी . मोरे आदी  उपस्थित होते .