महाराष्ट्र न्यूज वन प्रतिनिधी, कोल्हापूर : छत्रपती शिवाजी महाराजांच्या शिवराज्याभिषेक दिनाच्या निमित्ताने अखिल भारतीय मराठा महासंघातर्फे विविध ३१ मे ते सहा जून २०२५ या कालावधीत विविध कार्यक्रम आयोजित केले आहेत.अशी माहिती महासंघाचे राष्ट्रीय उपाध्यक्ष वसंतराव मुळीक यांनी दिली. सहा जून हा शिवराज्याभिषेक दिन आहे.

३१ मे रोजी सकाळी ११ वाजता फेटा बांधणी प्रशिक्षण कार्यक्रम आहे. एक जून ते तीन जून या कालावधीत राजर्षी शाहू स्मारक भवन येथे महाराणी ताराबाई यांच्या इतिहासावर आधारित  प्रदर्शन व रांगोळी साकारण्यात येणार आहे. दोन जून रोजी सायंकाळी ५.३० वाजता इतिहास संशोधक  डॉ. जयसिंगराव पवार यांचे ‘स्वातंत्र्य सौदामिनी महाराणी ताराबाईंची शौर्यगाथा’ या विषयावर व्याख्यान आहे.

इतिहास अभ्यासक इंद्रजीत सावंत यांचे तीन जून रोजी ‘महाराणी ताराबाईंसमोर दिल्ली दीनवाणी’या विषयी व्याख्यान आहे. जागतिक पर्यावरण दिनाचे औचित्य साधून पाच जून रोजी वृक्षारोपण करण्यात येणार आहे. सहा जून रोजी शिवराज्याभिषेक दिनानिमित्त मिरवणूक काढण्यात येणार आहे. मिरवणुकीत रथ, मर्दानी खेळ, मुली व महिलांचे लेझीम पथक, झांजपथक, प्रबोधनात्मक फलक, वारकरी संप्रदाय, धनगरी ढोलचा समावेश आहे. पत्रकार परिषदेला मराठा महासंघाचे जिल्हाध्यक्ष शशिकांत पाटील, शैलजा भोसले, बबन रानगे, कादर मलबारी, उदय देसाई, संजय पोवार वाईकर, अशोक माळी, शंकराव शेळके, प्रकाश पाटील, विजय पाटील, संयोगिता देसाई आदी उपस्थित होते.