महाराष्ट्र न्यूज वन प्रतिनिधी, कोल्हापूर : राजकीय घडामोडीमुळे  गोकुळ दूध संघाच्या अध्यक्षपदाची निवड लक्षवेधी ठरली.अध्यक्षपदी निवड झाल्यानंतर नविद मुश्रीफ यांना  पत्रकारांनी, ‘गोकुळचा अध्यक्ष महायुतीचा झाला की महाविकासचा ? अशी विचारणा केली. त्यावर नूतन अध्यक्ष मुश्रीफ म्हणाले, ‘हम सब एक है” असे उत्तर दिले.  त्याचवेळी त्यांनी राजर्षी शाहू शेतकरी परिवर्तन आघाडीची आठवण करुन दिली.

 मी गट-तटाच्या पलीकडे जाऊन, "सहकार हा आमचा धर्म" या मूल्याशी प्रामाणिक राहून कार्य करीन. गोकुळ ही संस्था सर्वांसाठी खुली, उत्तरदायी आणि सर्वसमावेशक राहील, यासाठी मी कटिबद्ध आहे. माझी ही निवड ही केवळ माझी नाही, तर आपणा सर्वांच्या विश्वासाची आणि एकतेची निवड असल्याचे त्यांनी सांगितले. दरम्यान  नूतन चेअरमन नविद मुश्रीफ म्हणाले, गोकुळ दूध संघाच्या चेअरमनपदी माझी एकमताने निवड करून जो विश्वास माझ्यावर दाखवण्यात आला आहे. त्याबद्दल मी शाहू आघाडीचे सर्व नेते मंडळी, माझे सहकारी संचालक मंडळ तसेच माझ्या शेतकरी बांधवांचे मनपूर्वक आभार मानतो. मी भविष्यात काम करत असताना दूध उत्पादक शेतकऱ्यांना जास्तीत जास्त दूध दर देण्यासाठी कटिबद्ध असून दूध संकलन, प्रक्रिया आणि विक्री व्यवस्था अधिक पारदर्शक व कार्यक्षम राबूवन नव्या तंत्रज्ञानाचा व्यवस्थापन प्रणालींचा समावेश करून  गोकुळची  गुणवत्ता आणि ब्रँडची विश्वासार्हता राष्ट्रीय व आंतरराष्ट्रीय पातळीवर नेणार आहे. तसेच या दुग्ध व्यवसायामध्ये महिला व युवा शेतकरी  अधिक सक्रीय होण्यासाठी त्यांना गोकुळमार्फत प्रोत्साहन देऊ.

 गोकुळच्या महालक्ष्मी पशुखाद्याची वाढती मागणी लक्षात घेता येत्या नजीकच्या काळात गडमुडशिंगी येथे टीएमआर प्लाँट विस्तारीकरण व पशुखाद्य कारखान्याचे नूतनीकरण करण्याचे नियोजन आहे. तसेच मुंबई, पुणे येथील दूध उत्पादनाची मागणी लक्षात घेता नवी मुंबई वाशी येथे उभारणी  केलेल्या १५ मे.टन क्षमतेचा दही प्रकल्प लवकरच कार्यान्वित करणार आहे. गायी- म्हैशींच्या गाभण कालावधीच्या शेवटच्या दोन महिन्यासाठी आवश्यक प्रेग्नेसी रेशनचे उत्पादन (पशुखाद्य) घेणेचे नियोजन आहे. नवीन दुग्धजन्य उत्पादनांची निर्मिती व मार्केट विस्तार या सारखे संघ हिताचे निर्णय सर्वांच्या सहकार्याने घेणार आहे.’असे म्हणाले.