महाराष्ट्र न्यूज वन प्रतिनिधी, कोल्हापूर : पुण्यश्लोक अहिल्यादेवी होळकर यांच्या जयंतीनिमित्त ३० मे ते एक जून २०२५ या कालावधीत विविध कार्यक्रम होत आहे. अशी माहिती मल्हारसेना सरसेनापती बबनराव रानगे यांनी दिली. अहिल्यादेवी यांची जयंती शनिवारी, ३१ मे रोजी साजरी होत आहे. आपटेनगर, नवीन वाशी नाका येथील स्मारक परिसरात कार्यक्रमांचे सादरीकरण आहे.

शुक्रवारी, ३० मे रोजी  वाशी येथील शिवाजी लांडगे यांचा धनगरी ओव्यांचा कार्यक्रम आहे. सायंकाळी सात वाजता हा कार्यक्रम होईल. ३१ मे रोजी सकाळी ९.३० वाजता पुण्यश्लोक अहिल्यादेवी यांना अभिवादन कार्यक्रम आहे. खासदार शाहू महाराज, आमदार सतेज पाटील यांच्या हस्ते अहिल्यादेवींच्या पूर्णाकृती पुतळयास पुष्पहार अर्पण करण्यात येईल. सकाळी दहा वाजता सिंधुदुर्गचे शिक्षणाधिकारी शाहीर बाबूराव कांबळे हे पोवाडा सादर करतील. रात्री सात वाजता फुलेवाडी रिंगरोड येथील महालक्ष्मी माऊली सेवा मंडळाचा भजनाचा कार्यक्रम आहे.

रविवारी, एक जून रोजी सायंकाळी पाच वाजता मिरजकर तिकटी येथून शोभायात्रा काढण्यात येणार आहे. यामध्ये अहिल्यादेवींचा पूर्णाकृती पुतळा, चित्ररथ, धनगरी ढोल, गजनृत्य, बेंजो पथक, लेझीम पथकाचा समावेश आहे. शोभायात्रेत नागरिकांनी मोठया संख्येने उपस्थित राहावे असे आवाहन करण्यात आले आहे.