समुपदेशन द्वारे पदस्थापनेची प्रक्रिया सुरू असताना दुपारी दीड वाजण्याच्या सुमारास शिक्षक हरीभाऊ दिगंबर विरणक यांच्या वडिलांचे निधन झाले असा मेसेज आला. शिक्षक विरणक यांना तर काही सुचेना. वडिलांच्या निधनाच्या वार्तेने धक्का बसलेला. दूरवर गाव. दुसरीकडे शिक्षक म्हणून पदस्थापना मिळणार होती. हातात नोकरीची ऑर्डर होती.  त्यांनी सभागृहाबाहेरील अधिकाऱ्यांना, वडिलांच्या निधनाची कल्पना दिली. अधिकाऱ्यांनी तत्काळ, सीईओ कार्तिकेयन यांना कळविले. मुख्य कार्यकारी अधिकारी कार्तिकेयन एस हे त्या शिक्षकाला भेटण्यासाठी झटकन सभागृहाबाहेर आले.   सीईओना पाहताच त्या शिक्षकाला अश्रू अनावर आले. सीईओंच्या खांद्यावर डोकं ठेवत त्यांनी अश्रूंना वाट मोकळी करुन दिली. सीईओंनी त्या शिक्षकाचे सांत्वन केले. धीर दिला. आणि त्या शिक्षकांना स्वतःच्या गाडीतून पोहचविण्याचे नियोजन केले. स्वतः त्या शिक्षकाला घेऊन गाडीपर्यंत गेले. ड्रायव्हरला सूचना केल्या. पुढे त्याच्या पदस्थापननेची प्रक्रिया पूर्ण केली. मनाला चटका लावणारी ही सारी घटना. दरम्यान सीईओ  कार्तिकेयन एस यांनी दाखविलेली संवेदनशीलता, माणुसकी आणि  तत्परता या साऱ्या गोष्टी मात्र उपस्थित शिक्षकांना मनापासून भावल्या. जिल्हा परिषदेच्या तरुण अधिकाऱ्याच्या माध्यमातून समजंस पालकत्व लाभल्याच्या प्रतिक्रिया उमटल्या.