महाराष्ट्र न्यूज वन प्रतिनिधी, कोल्हापूर : गोकुळ दूध संघाच्या वतीने दूध उत्‍पादन वाढीसाठी व उत्‍पादकांना प्रोत्‍साहन देण्यासाठी आयोजित गोकुळश्री स्पर्धेतंर्गत म्हैस गटातील विजेत्या दूध उत्पादकांच्या बक्षीस रकमेत वाढ केली आहे. तसेच यावर्षीपासून म्हैस दूध वाढीसाठी प्रोत्साहन मिळावे म्हणून एकूण बक्षीस रक्कमेत १५ हजार रुपयांनी  वाढ केली आहे. गोकुळतर्फे ३१ वर्षापासून या स्पर्धेचे आयोजन केले जात आहे.

दरम्यान २०२४-२५ मध्‍ये घेण्‍यात  स्‍पर्धेमध्‍ये एकूण ९३ म्‍हैस व गाय दूध उत्‍पादकांनी सहभाग घेतला होता.  या स्पर्धेत श्री जोतिर्लिंग सह. दूध व्‍यावसायिक संस्‍था लिंगनूर कसबा नूल  संस्थेचे शुभम कृष्णा मोरे यांच्‍या मालकीच्या मुऱ्हा जातीच्या म्‍हैशीने एका दिवसात सकाळ व सांयकाळी मिळून १९ लिटर ७३० मि.ली. इतके दूध देवून प्रथम क्रमांक मिळवला. श्री जनसेवा सह. दूध व्‍याव. संस्‍था दुधगंगानगर, कसबा सांगाव  संस्थेचे गाय संकेत किरण चौगले यांच्‍या मालकीच्या  एच.एफ जातीच्या गायीने सकाळ व सांयकाळ पाळीमध्ये एकूण ४२ लिटर ३०५ मि.ली. दूध देवून प्रथम क्रमांक मिळवला.

स्पर्धेमुळे दूध उत्पादन वाढीबरोबरच गुणवत्तेमध्ये सुधारणा होण्यास मदत होते. तसेच या स्पर्धेमध्ये भाग घेणारे सर्व दूध उत्पादक व विजेत्या दूध उत्‍पादक अभिनंदनास पात्र असून पुढील वर्षी जास्तीत जास्त दूध उत्पादकांनी ‘गोकुळश्री’स्पर्धेत भाग घ्यावा असे आवाहन चेअरमन अरुण डोंगळे यांनी केले आहे. दूध उत्पादकांचा या स्पर्धेतील वाढता सहभाग पाहता गोकुळच्या कार्यक्षेत्रातील दूध उत्पादक आपल्या जनावरांतील उत्पादन क्षमता वाढीसाठी प्रयत्नशील असल्‍याचे दिसून येते असे कार्यकारी संचालक योगेश गोडबोले यांनी नमूद केले.

बक्षीस रकमेत वाढ केल्यामुळे म्हैस गटात पहिल्या क्रमांकांच्या विजेत्यांना ३५ हजार, द्वितीय क्रमांकांना ३० हजार तर तृतीय क्रमांकाच्या विजेत्यांना २५ हजार रुपये मिळणार आहेत.